«Սուրիոյ Մէջ Բռնարարքներուն Վերջ Տալու Համար ՄԱԿ-ի Միջամտութիւնը Կարեւոր Է» Կ՛ըսէ Սէուտ Ֆայսալ

Սէուտական Արաբիոյ արտաքին գործոց նախարար Սէուտ Ֆայսալ իշխանը մամլոյ ասուլիսի մը ընթացքին յայտնեց, որ «Սուրիոյ մէջ բռնարարքներուն վերջ տալու համար ՄԱԿ-ի միջամտութիւնը կարեւոր է»:
«Պէտք է սուրիական տագնապին նկատմամբ միջազգային տեսակէտները միաւորել», ըսաւ ան` նշելով, որ «սուրիական հարցը սուրիացիներէն կախեալ է»:
«Սուրիական վարչակարգը կը մերժէ խաղաղ լուծումը եւ իշխանութեան փոխանցումը, իսկ միջազգային ընտանիքը բռնարարքները դադրեցնելու կարողութիւնը չունի», ըսաւ ան` հարց տալով, որ «վարչակարգին կողմէ այս մերժումին եւ արիւնահեղութեան ի տես միջազգային ընտանիքը ի՞նչ պիտի ընէ»: «Քաղաքական լուծման մերժումին պատասխանատուն իշխանութիւնն է», նշեց Սէուտ Ֆայսալ իշխանը:
Սուրիոյ նախագահ Պաշշար Ասատ երէկ սուրիական կառավարութեան նիստին ընթացքին յայտնեց, որ Սուրիոյ դիմագրաւած ներկայ կացութիւնը պատճառ դարձած է, որ քաղաքացիներուն յոյսերը առաւել եւս կապուին կառավարութենէն իրենց յուսացածին` նշելով, որ քաղաքացին եւս իր պարտաւորութիւնը պէտք է կատարէ` հասնելով մինչեւ իւրաքանչիւր պետական հաստատութեան կամ պետութեան եւ քաղաքացիներուն միջեւ հաւաքական աշխատանքին, որպէսզի տագնապին ազդեցութիւնը մեղմանայ: