2013-02-14 08:14:38

Vijana wa Taizè wanamkumbuka Baba Mtakatifu Benedikto XVI


Jumuiya ya Kiekumene ya Taizè inachukua fursa hii kumshukuru Baba Mtakatifu Benedikto wa kumi na sita, kwa kuweza kuwapokea na kushiriki na umati mkubwa wa vijana waliokuwa wanashiriki kwenye mkutano wa Sala wa vijana wa Taizè Ulaya, uliofanyika mwishoni mwa mwaka 2012, kwenye Uwanja wa Kanisa kuu la Mtakatifu Petro, mjini Vatican. Kwa vijana wa Taizè hili lilikuwa ni tukio la neema lililowaonjesha vijana mchakato wa kujenga na kujiimaarisha katika umoja na Kristo, ili wote wawe wamoja.

Vijana walipata bahati ya kulitafakari Fumbo la Msalaba linalowachangamotisha waamini kujenga uhusiano wa dhati na Mwenyezi Mungu. Katika kipindi chote cha uongozi wake anasema Fra Alois, Mkuu wa Jumuiya ya Kiekumene ya Taizè, kwamba, amewaimarisha waamini katika imani, matumaini na mapendo, kwa njia ya nyaraka zake za kichungaji, katekesi, changamoto ya kusonga mbele kwa imani na matumaini ili kuweza kukabiliana na changamoto mbali mbali zinazojitokeza katika ulimwengu mamboleo.

Kwa upande wake, Mheshimiwa Padre Adolfo Nicolas, Mkuu wa Shirika la Wayesuit, kwa niaba ya Wayesuit wenzake, wanamshukuru na kumpongeza Baba Mtakatifu Benedikto wa kumi na sita, kwa hekima, busara na unyenyekevu pamoja na upendo mkubwa aliouonesha kwa Kristo na Kanisa lake. Wanakumbuka changamoto aliyowapatia Wayesuit walipokuwa wanaadhimisha Mkutano wao mkuu wa thelathini na tano, alipowaambia kwamba, wanapaswa kuthubutu kwenda mahali ambapo wengine wanshindwa kwenda: iwe ni kiroho au kijiografia.

Wanamshukuru Baba Mtakatifu kwa kuwaamini wanapoendelea kutekeleza ile nadhiri ya nne ya Utii kwa Khalifa wa Mtakatifu Petro, katika utekelezaji wa dhamana na utume wake ndani ya Kanisa. Wanaendelea kumkumbuka kwa sala na kujiamisha tena kwa Khalifa wa Mtakatifu Petro katika utekelezaji wa utume wake. Ni matumaini yao kwamba, Kristo Mfufuka ataendelea kuwa mwaminifu kwa ahadi yake ya kuwa pamoja na Kanisa hadi utimilifu wa dahari.








All the contents on this site are copyrighted ©.