Benedikti XVI besimtarëve: kam hequr dorë me liri të plotë, për të mirën e Kishës,
nuk kam forca të nevojshme për misionin tim papnor. Ju falënderoj për dashurinë e
lutjen tuaj.
U prit me ngrohtësi e dashuri të madhe Benedikti XVI sot, në audiencën e tij të parafundit
të përgjithshme të papnisë, në Sallën e Palit VI, në Vatikan. Ishte dalja e parë publike,
pas njoftimit për dorëheqjen nga selia papnore, më 28 shkurtin e ardhshëm. Benedikti
XVI u ndal shkurt tek vendimi i tërheqjes nga shërbimi pjetrin, në udhëheqje të Kishës,
duke theksuar edhe një herë arsyen e këtij gjesti historik e të rëndësishëm, plot
dashuri për të mirën e Kishës, në realitetin bashkëkohor. Ja edhe fjalët, që u
drejtoi besimtarëve të pranishëm, në fillim të audiencës: Të dashur vëllezër
e motra, Siç e dini, vendosa të heq dorë nga ministeri, që Zoti ma
besoi më 19 prill 2005. E bëra këtë me liri të plotë, për të mirën e Kishës, pasi
u luta gjatë dhe rrëmova, para syve të Zotit, ndërgjegjen time, thellësisht i vetëdijshëm
për seriozitetin e këtij akti, por po aq i vetëdijshëm edhe se nuk jam më në gjendje
ta kryej misionin tim papnor me atë energji, që kërkon. Më ndihmon e më shndrit siguria
se Kisha është e Krishtit, i Cili nuk do ta lërë kurrë pa drejtim e kujdes. Ju falënderoj
të gjithë për dashurinë dhe lutjen, me të cilën më shoqëruat. E ndjeva
gati fizikisht, në këto ditë aspak të lehta për mua, forcën e uratës, që ma dhanë
dashuria e Kishës e lutjet tuaja. Vijoni të luteni për mua, për Kishën, për Papën
e ardhshëm. Zoti do të na prijë!”. Pas përshëndetjes, Papa Benedikti XVI vijoi
katekizmin e zakonshëm të audiencës së përgjithshme, duke u ndaluar sot tek tundimet
e Jezusit. Katekizmi i Papës u mbajt në një ditë të veçantë liturgjike, të Mërkurën
e Përhime e në fillim të kohës së Kreshmëve.