Սուրբ Աթոռի բանբեր` Հայր ֆետերիքօ Լոմպարտին, երեքշաբթի 12 փետրուարի կէսօրին, Վատիկանի
մամլոյ գրասենեակի մէջ ունեցած իր ելոյթի ընթացքին յայտարարած է թէ ''Սրբազան Հայրը
հանգիստ ու շատ խաղաղ է, առողջապահական պատճառներ չեն որ զինք մղած են հրաժարականը ներկայացնելու
այլ միայն ծերութեան դիւրաբեկ կացութիւնը''։ Վատիկանի բանբերը ապա յայտնած է թէ
Սրբազան Քահանայապետին նախատեսուած յառաջիկայ բոլոր գործունէութիւնները, մինչեւ 28 փետրուար,
հաստատուած կը մնան ներառեալ 27 փետրուարի հրապարակային ունկնդրութիւնը։ Թէեւ - ըսած
է Հայր Լոմպարտին- Սրբազան Քահանայապետի ''Հաւատքի'' մասին շրջաբերական թուղթը լոյս
պիտի չտեսնէ։ Սուրբ Աթոռի մամլոյ գրասենաեկի տնօրէնը հուսկ հրաւէր յղած է ''ուշադրութեամբ
հետեւելու Սրբազան Քահանայապետին վերջին օրերու պատգամներուն, սկսեալ վաղուայ (13/2)
չորեքշաբթի օրուայ հրապարակային ունկնդրութենէն։ Ան ապա վերահաստատած է Վատիկանի օրաթերթ`
Օսսեվաթորէ Րոմանոյի յայտարարութիւնը, ըստ որուն Նորին Սրբութիւնը հրաժարականի մասին
սկսած է մտածել Մէքսիքօ եւ Գուպա կատարած երկար եւ սպառիչ առաքելական ճամբոդորդութեան
աւարտին։