Papa në Engjëllin e Tënzot: t’u kumtohet Krishti të gjithëve, pa u çkurajuar, me bindjen
se është Zoti ai që shndërron
T’ua kumtojmë Krishtin të gjithë njerëzve, pa frikë nga ligështia jonë, sepse është
mëshira e Zotit ajo, që shndërron e përtërin: këtë pohoi Papa në lutjen e djeshme
të Engjëllit të Tënzot, përballë një numri të madh shtegtarësh, të pranishëm në Sheshin
e Shën Pjetrit, në një ditë të akullt, ndriçuar nga dielli dimëror, që ndriste, pa
ngrohur. Më pas Benedikti XVI kujtoi Ditën botërore të të sëmurit, kremtuar sot dhe
u drejtoi përshëndetjen e vet popujve aziatikë, në festë për Vitin e ri hënor. Apostujt
e Ungjillit nuk çkurajohen kurrë duke ua kumtuar Krishtin të gjithë njerëzve, deri
në skajet më të largëta të botës: kjo ishte ftesa e Papës, në sa komentonte fragmentin
ungjillor të së dielës, në të cilin Jezusi e fton Pjetrin ta mposhtë mosbesimin, edhe
mbasi ka hedhur rrjetat gjithë natën, pa zënë asnjë peshk. Pjetri i beson Zotit, hedh
sërisht rrjetat e provon peshkimin e mrekullueshëm, para se të bëhet ‘peshkatar njerëzish’.
Ky tekst ungjillor, nënvizoi Benedikti XVI, na bën të kuptojmë pedagogjinë e thirrjes
së Hyjit, që nuk e shikon aq cilësinë e të zgjedhurve, sa fenë e tyre. E na lë të
kuptojmë se thirrja për rrugën meshtarake e rregulltare është vepër e vetë Zotit:
“Njeriu nuk është autori i thirrjes së tij, është përgjigje ndaj propozimit
hyjnor; e ligështia njerëzore nuk duhet të shkaktojë frikë, në se Zoti thërret; duhet
besuar gjithnjë më shumë në pushtetin e mëshirës së Tij, që shndërron e përtërin”. E
kjo mëshirë përfshin gjithë misionin e Kishës e cila, gjatë jetës tokësore, është
e thirrur t’i mirëpresë të gjithë, të mirë e të këqinj. Pa harruar, veç, se pas ngjalljes,
do të përfshijë vetëm të mirët. Prej këndej, lutja e Papës: “Kjo Fjalë e Zotit
gjallëroftë edhe në shpirtin tonë e në bashkësitë tona të krishtera, guximin, besimin
e zellin për ta kumtuar e për ta dëshmuar Ungjillin. Dështimet e vështirësitë nuk
duhet të na çkurajojnë. Ne duhet vetëm të hedhim rrjetat, pjesën tjetër e bën vetë
Zoti”. Pas lutjes së Engjëllit të Tënzot, Papa kujtoi popujt e Lindjes së
Largët, që kremtojnë Vitin e ri hënor. “Paqja, harmonia e mirënjohja ndaj qiellit,
vërejti Ati i Shenjtë, janë vlera universale, që kremtohen në këtë festë gazmore e
dëshirohen nga të gjithë, për të ndërtuar familjen, shoqërinë, kombin: “Uroj
të realizohen për këta popuj dëshirat për një jetë më të lumtur e më të begatë. U
drejtoj një përshëndetje të posaçme katolikëve të këtyre vendeve, duke uruar që,
në këtë Vit të fesë, ta lënë dijen e Krishtit t’u prijë në udhën e tyre”. Më
pas Papa kujtoi se sot, festa liturgjike e Zojës Lurdë, kremtohet edhe Dita botërore
e të sëmurit. Benedikti XVI i ftoi të gjithë të kujdesen për njerëzit që vuajnë e
t’i vizitojnë të sëmurët, sipas porosisë së Krishtit, që me dashurinë e ndihmën tonë,
të rigjejnë shpresën dhe besimin në Zotin, i cili i do. Kremtimi solemn i Ditës
u mbajt në Shenjtëroren mariane të Alttöting, në Bavari: “Me lutje e zemër jam
pranë gjithë të sëmurëve e bashkohem shpirtërisht me ata, që do të mblidhen në këtë
Shenjtërore, shumë e dashur për mua”.Në përfundim, Papa vlerësoi lart nismën e
“Grumbullimit të ilaçeve’, që dje organizoi mbledhjen e ilaçeve në Itali, Spanjë e
Portugali.