Папская рада па культуры: паказаць прыгажосць хрысціянскага жыцця

Неабходна прымаць моладзь без стэрэатыпаў і маралізарства. Да такой высновы прыйшлі ўдзельнікі пленарнага пасяджэння Папскай рады па культуры, якое праходзіла ў Ватыкане 6-9 лютага. На заканчэнне форума, было апублікавана спецыяльнае выніковае паведамленне, у якім, у сціснутай форме, прадстаўлены вынікі дыскусій. Між іншым адзначаецца, што сённяшнія маладыя людзі, з’яўляюцца адлюстраваннем крызіса грамадства і таму патрабуюць разумення, якое будзе ўключаць у сябе не толькі культурнае вымярэнне, але таксама эканамічнае і структурнае. У дакуменце прыводзіцца прыклад, “індыньядас” – маладых удзельнікаў шматлікіх маніфестацый, якія скалыхнулі Еўропу, на працягу 2011-2012 г. Адзначаецца, што яны выражаюць “стомленасць маладых людзей перад абліччам існуючай сістэмы” і ставяць пад пытанне актуальнасць “старых формаў палітычнай дзейнасці і звычайнага спосабу абвяшчэння веры”.

Таксама звяртаецца ўвага, што новыя тэхналогіі занялі асабліва важнае месца ў фарміраванні ідэнтычнасці сучаснай моладзі – ідэнтычнасці, якая ў пэўных мадэлях і групах знаходзіць гарантыю бяспекі. Акрамя таго, падкрэсліваецца, што дзякуючы новым СМІ, моладзь прызвычаілася сама задаваць шматлікія пытанні і пакідаць каментары да іх. У сувязі з гэтым неабходна ствараць месцы, дзе можна будзе адказваць на самыя радыкальныя пытанні моладзі, а таксама вучыцца разумець яе “граматыку”.

“Многія маладыя людзі не разумеюць мову Касцёла, а Касцёл не разумее мову моладзі”, - адзначаецца ў дакуменце Папскай рады і падкрэсліваецца, што гэта выклік, на які неабходна адказаць. Моладзь часта шукае глыбокага сэнсу і таму неабходна максімальна ясна прадставіць прыгажосць і радасць хрысціянскага жыцця, евангельскіх запаведзяў, якія дазваляюць дасягнуць шчасця і поўні. Падрыхтоўка маладых хрысціян – гэта выраз “адказнасці перад будучыняй, каб будаваць паўсюднае братэрства”, адзначаецца ў дакуменце.