Արամ Ա. Կաթողիկոս Կը Նախագահէ Մերձաւոր Արեւելքի Եկեղեցիներու Խորհուրդի Գործադիր Վարչութեան
Ժողովին
Երեքշաբթի կէսօրէ ետք Անթիլիասի Մայր տաճարին մէջ գումարուեցաւ Միջին Արեւելքի եկեղեցիներու
խորհուրդի գործադիր վարչութեան հանդիպումը` մասնակցութեամբ Լիբանանի մէջ ապրող անդամներուն:
Հանդիպումին ներկայ էին նաեւ խորհուրդի ընդհանուր քարտուղար Փոլ Եուհաննա եպիսկոպոս եւ
բարձրաստիճան այլ պաշտօնեաներ: Յիշեալ բացառիկ նիստին օրակարգի գլխաւոր հարցերն էին`
նոր ընդհանուր քարտուղարի ընտրութեան հոլովոյթի ճշդում, խորհուրդի տնտեսական ներկայ կացութեան
արժեւորում, Սուրիոյ գաղթականներուն օգնութիւն, յառաջիկայ մայիսին Լիբանանի մէջ տեղի
ունենալիք «Քրիստոնէութեան ներկայութիւնը եւ վկայութիւնը Միջին Արեւելքի մէջ» միջազգային
համագումարի պատրաստութիւն: Վերոյիշեալ հարցերուն գծով իր եզրափակիչ խօսքին մէջ վեհափառ
հայրապետը շեշտեց Միջին Արեւելքի եկեղեցիներուն խորհուրդին վիճակուած յոյժ կարեւոր առաքելութիւնը
մանաւանդ շրջանի պատմութեան այս վճռական հանգրուանին: Հետեւաբար, վեհափառը կոչ ուղղեց
շրջանի բոլոր եկեղեցիներուն իրենց մասնակցութեամբ եւ գործակցութեամբ առաւել հզօրացնելու
խորհուրդին առաքելութիւնը` յիշեցնելով միաժամանակ, որ ան միակ կառոյցն է, որ կ՛արտայայտէ
եկեղեցիներու հաւաքական կամքը եւ կեցուածքը: Գործադիր վարչութեան լիակատար նիստը տեղի
պիտի ունենայ յառաջիկայ ապրիլին` դարձեալ Անթիլիասի մայրավանքին մէջ: