Ngushëllimet e Papës për vdekjen e kardinalit Xhovani Keli: ishte 94 vjeç.
Ndërroi jetë në Romë, kardinali Xhovani Keli, kryetar nderi i Këshillit Papnor të
baritorisë për emigrantët edhe endacakët: ishte 94 vjeç. Mesha e dritës, kryesuar
nga kardinali Anxhelo Sodano, dekan i Kolegjit kardinalor, do të kremtohet nesër,
në orën 17.30, në bazilikën e Shën Pjetrit, në Vatikan. Në një telegram, drejtuar
imzot Françesko Ravinale, ipeshkëv i Astit, Papa shpreh ngushëllimet për humbjen e
kardinalit Keli, të cilin e quan “ bari i zellshëm, besnik ndaj Ungjillit e Kishës”.
Benedikti XVI kujton me mirënjohje kontributin e çmuar që i dha Selisë Apostolike
dhe bashkëpunimin për disa dhjetëvjeçarë në fushën delikate të emigracionit. Kardinali
Keli, shkruhet në telegramin papnor, lë pas dëshminë e një jete, shkrirë në Kishë,
për Kishën e besimtarët e posaçërisht, për formimin e krishterë të rinisë. Lindur
në Torino, më 1918; shuguruar meshtar në Asti, më 1942; në shërbim diplomatik e më
pas kurial të Selisë së Shenjtë; bashkëpunëtor i ngushtë i kardinalit Kazaroli, në
përpjekjet për të çarë perden e hekurt e për të depërtuar në Kishën e heshtimit, më
1986 emërohet kryetar i parë i Komisionit për baritorinë e emigrantëve dhe endacakëve,
më pas, Këshill Papnor e më 21 tetor 1988 krijohet kardinal nga Papa Gjon Pali II. Me
vdekjen e tij Kolegji kardinalor numëron 209 kardinaj, 118 me të drejtë zgjedhore,
91, mbi moshën 80 vjeç.