Թունուզի Մէջ Ընդդիմադիր Ղեկավարի Մը Ահաբեկումը Բողոքի Ցոյցեր Եւ Անկարգութիւններ Կը
Հրահրէ
Թունուզի մէջ ընդդիմադիր ղեկավարներէն Շուքրի Պելիտ մայրաքաղաք Թունուզի մէջ գտնուող
իր տան առջեւ ահաբեկուեցաւ: Անոր ազգականները յայտնեցին, որ ան իր վիզէն եւ գլխէն փամփուշտ
ստացած է: Յունուար 2011-ին «Արաբական գարնան» սկիզբէն ի վեր ասիկա քաղաքական գործիչի
մը ահաբեկման առաջին պարագան է: Աշխարհիկ քաղաքական գործիչ Պելիտ իսլամական Նահտա
կուսակցութեան ղեկավարութեամբ կառավարութեան ականաւոր ընդդիմադիր մըն էր եւ անոր սպանութիւնը
ամբողջ երկրին տարածքին բողոքի ցոյցեր, ինչպէս նաեւ ցուցարարներու եւ ոստիկանութեան միջեւ
բախումներ հրահրեց: Պելիտ ձախակողմեան Ժողովրդային ճակատ կուսակցութեան գործավարն էր:
Ան շաբաթ օր Նահտա կուսակցութեան կողմէ վարձուած «վարձկաններ» ամբաստանած էր Ժողովրդային
ճակատի ժողովի մը դէմ կատարուած յարձակումին համար: Ֆրանսայի նախագահ Ֆրանսուա Հոլլանտ
յայտարարեց, որ «սպանութիւնը Թունուզը կը զրկէ իր ամէնէն քաջարի եւ ազատ ձայներէն մէկէն»: Թունուզի
նախագահ Մունսեֆ Մարզուքի դատապարտեց Պելիտի սպանութիւնը եւ Ֆրանսա իր այցելութիւնը ընդհատելով
վերադարձաւ երկիր: «Մեր խաղաղ յեղափոխութեան բազմաթիւ թշնամիներ կան եւ անոնք վճռակամ
են անոր ձախողութիւնը ապահովելու», ընդգծեց Մարզուքի: Երկրին վարչապետը յայտնեց, որ
Պելիտի սպանութիւնը «ահաբեկչական արարք» մըն է, եւ խոստացաւ ամէն ջանք թափել զայն գործադրողը
«անմիջապէս» ձերբակալելու համար: