Ідучы супраць Бога, чалавек ідзе супраць самаго сябе
“Ідучы супраць Стварыцеля,
чалавек ідзе супраць самаго сябе”, - сказаў Бэнэдыкт XVI падчас агульнай аўдыенцыі,
якая прайшла 6 лютага ў Ватыкане. Папа працягнуў серыю катэхез прысвечаных Сімвалу
веры. Ён засяродзіўся над словамі, якімі вернікі сцвярджаюць, што вераць у Бога “Стварыцеля
неба і зямлі”. Пантыфік нагадаў, што падрабязна працэс стварэння сусвету Богам апісаны
на першых старонак Кнігі Быцця. Аднак падкрэсліў, што Біблія не мае на мэце быць “падручнікам
па натуральным навукам”, але – “дапамагчы зразумець сапраўдную і глыбокую праўду аб
рэчах”. “Фундаментальныя праўды, якія адкрываюць апавяданні Кнігі Быцця заключаюцца
ў тым, што свет, гэта не лучнасць супрацьстаячых сіл. Ён мае сваё паходжанне і апору
ў Логасе, у вечным Розуме Бога, які працягвае падтрымліваць сусвет. Ёсць пэўная задума
аб свеце, якая паходзіць ад гэтага Розуму, ад Духа Стварыцеля. Вера ў гэта, асвячае
кожны аспект існавання і дае адвагу з даверам і надзеяй прымаць жыццёвыя прыгоды”,
- сказаў Папа.
Бэнэдыкт XVI засяродзіўся над “вяршыняй стварэння”: чалавекам
– адзіным, хто “здольны пазнаць і любіць свайго Стварыцеля”. Гаворачы аб яго паходжанні
Папа падкрэсліў два элементы. Па-першае, ён нагадаў, што чалавек быў створаны з зямлі,
- а гэта з’яўляецца прычынай роўнасці людзей, нягледзячы на іх культурныя і сацыяльныя
адметнасці. Па-другое Пантыфік падкрэсліў, што чалавек быў створаны на вобраз і падабенства
Бога. “Мы усе носім у сябе дыханне Бога і кожнае чалавечае жыццё, – кажа нам Біблія,
– знаходзіцца пад Яго абаронай”, – адзначыў ён. Бэнэдыкт XVI нагадаў, што гэта фундаментальная
праўда з’яўляецца “самай глыбокай прычынай непарушнасці чалавечай годнасці” і супрацьстаяння
“спробам лічыцца з чалавекам паводле крытэрыяў утылітарызму і улады”.
Бэнэдыкт
XVI звярнуў увагу на тое, што на старонках Кнігі Быцця прадстаўлены іншыя два важныя
вобразы: дрэва пазнання дабра і зла і змея. Ён адзначыў, што Бог пасяліў чалавека
не ў дзікі сад, але месца у якім ён быў абаронены, насычаны і падтрыманы. Папа заклікаў
памятаць, што “свет – гэта не ўласнасць якую можна рабаваць і падвяргаць злоўжыванням,
але дар Стварыцеля, знак Яго збаўчай волі – дар, які трэба даглядаць і абараняць”.
Гаворачы
пра вобраз змея Пантыфік адзначыў, што звяртаючыся да Адама і Евы, ён не адмаўляў
існавання Бога, але прадставіў запавет з Ім, “як ланцуг, які пазбаўляе свабоды і самых
каштоўных і прыгожых рэчаў у свеце”. “Спакусай становіцца тое, каб пачаць будаваць
самім свет у якім жывем, і не прымаць абмежаванні быцця стварэннем, абмежаванні дабра
і зла, маральнасці; залежнасць ад творчай любові Бога бачна, як цяжар, ад якога неабходна
пазбавіцца. Але калі фальсіфікуюцца адносіны з Богам, ставячы самаго сябе на Яго месца,
рушацца ўсе іншыя адносіны”, - сказаў Святы Айцец.
Апошняя тэма якую закрануў
Пантыфік тычылася першароднага граху. Папа адзначыў, што гэтым грахом былі парушаны
фундаментальныя адносіны з Богам, у выніку чаго былі разбураны таксама адносіны з
усім іншым светам. Папа падкрэсліў, што каб аднавіць гэтыя адносіны прыйшоў Езус Хрыстус.
“Яго крыж, – паводле Святога Айца, – стаў новым дрэвам жыцця”.