Папа падзякаваў Мітрапаліту Кандрусевічу за падараваныя кнігі
Бэнэдыкт XVI падзякаваў
Мітрапаліту Мінска-Магілёўскаму арцыбіскупу Тадэвушу Кандрусевічу за дар “Святога
Евангелля” і першага тома “Літургіі гадзінаў” на беларускай мове, які іерарх здзейсніў
3 снежня ў Ватыкане. У спецыяльным лісце за падпісам намесніка Дзяржсакратара Яго
Святасці арцыбіскупа Анджэла Бэччу, адзначаецца, што Папа “высока ацаніў гэты дар
і думкі, якія яго матывавалі”. Пантыфік выказаў падзяку за выданні і “адначасова пажадаў,
каб багаты матэрыял Новага Запавету і малітвы Літургіі гадзінаў паспрыялі будаванню
грамадства ўсё больш духоўна братэрскага і салідарнага, узбагачанага ажыўляючым пасланнем
Хрыста”. Акрамя таго Святы Айцец выказаў “пажаданне хрысціянскага росквіту”, умацаваўшы
яго сваім Апостальскім благаслаўленнем для Мітрапаліта Тадэвуша Кандрусевіча і “ўсіх
тых, хто давераны яго пастырскай апецы”.