Koncert për nder të Papës e të Presidentit Napolitano: Kisha e Shteti bashkëpunojnë
për të mirën e përbashkët.
Shtatë vjet përvoje e reflektimesh të përbashkëta. Kështu e quajtën Benedikti XVI
dhe Presidenti Giorgio Napolitano rrugën e përshkuar së bashku deri në përkujtimin
djeshëm të 84-vjetorit të Pakteve Lateranense. E pikërisht me rastin e këtij përvjetori
u mbajt edhe Koncerti në Vatikan. Në program, Simfonia “Forca e fatit” e Gjuzepe Verdit
dhe Simfonia n. 3 e Betovenit, nga e cila Papa mori shtytjen për të reflektuar mbi
perspektivën e dashurisë hyjnore, që i hap feja njeriut. Në skenë, poshtë veprës monumentale
të Perikle Fazinos “Ngjallja”, më mahnitëse se kurrë nën lojën mjeshtrore të dritave,
Orkestra e mirënjohur e Majit Muzikor Fiorentin, me drejtuesin e saj të shquar, mjeshtrin
Zubin Mehta, i cili dje shprehu, në mikrofonin tonë, emocionet e rralla të këtij koncerti. I
emocionuar thellë, edhe publiku, në Sallën e Palit VI, i pranishëm në një Koncert
me dy domethënie: një historike e një tjetër, muzikore, ndoshta të papërsëritshme:
Paktet Lateranense, në 84 vjetorin e tyre e prania e Zubin Mehtës, në koncetin e
parë para Papës e në shtëpinë e Atit të Shenjtë. E akoma, fillimi i kremtimeve lidhur
me përvjetorin e Pakteve. Para se të fillonte koncerti, sipas një note të Sallës së
Shtypit të Vatikanit, Papa i shprehu kreut të Shtetit italian, “vëmendjen dhe pjesëmarrjen
në takimet e rëndësishme, që e presin së shpejti popullin e Italisë”. Një takim i
shkurtër, por intensiv, në kontekstin e afrimit të përfundimit të shtatëvjeçarit presidencial,
karakterizuar, siç dihet, nga nderimi i thellë reciprok. E ishte vetë Presidenti Napolitano
ai, që e kujtoi këtë, duke marrë fjalën, pa e fshehur emocionin e thellë, para se
të fillonte koncerti. Duke kujtuar pikërisht Paktet Lateranense e duke krijuar atmosferën
e një lloj lamtumire publike, Napolitano përmendi rrugën e gjatë të përshkuar, për
arritjen e një bashkëpunimi të qetë e besimplotë ndërmjet Shtetit e Kishës, në shërbim
të së mirës së përbashkët, por edhe rastet e takimeve, të dëgjimit, të dialogut reciprok,
motiv i përhershëm pasurimi: “Do të vijojmë, Shenjtëri, si italianë, në çfarëdo
pozite, t’i kushtojmë vëmendje mesazhve Tuaja, duke përfituar prej tyre për t’u pasuruar”. E
këtë ndarje të përbashkët të përvojës dhe të reflektimeve, për të cilën po flasim,
e kujtoi, më pas, edhe Papa i cili, në përfundim të koncertit, foli kryesisht për
ndikimin e muzikës mbi zemrën njerëzore. Kujtoi fillimisht Gjuzepe Verdin, në dyqindvjetorin
e lindjes, muzikant i cili, nënvizoi Papa, të prek thellë me aftësinë për të shprehur,
me tinguj, situata të ndryshme të jetës e, posaçërisht, dramat e shpirtit njerëzor.
Fati i personazheve të tij është gjithnjë tragjik e kështu, edhe “Forca e fatit”: “Por
duke përballuar temën e fatit, Verdi detyrohet të përballojë drejtpëdrejtë edhe temën
fetare, të ballafaqohet me Zotin, me fenë, me Kishën; kështu del në pah edhe një herë
shpirti i këtij muzikanti, shqetësimi i tij, në kërkim të besimit”. Në
këtë vepër gjejmë dy histori pendimi e afrimi tek Zoti e edhe një finale të modifikuar
me dashje nga autori, për të përfunduar me perspektivën e faljes e të lutjes drejtuar
Zotit: “Këtu ravijzohet drama e jetës njerëzore, vulosur nga fati tragjik
e nga malli për Zotin, për mëshirën e dashurinë e Tij, që japin dritë, kuptim, shpresë
edhe në errësirën më të thellë. Feja na e jep këtë mundësi, që nuk është e rreme,
por reale”. Ndërsa, duke folur për Simfoninë e 3-të të Betovenit, e posaçërisht
për episodin qëndror të Marshit funebër, Papa vërejti se tingujt e fuqishëm të muzikantit
gjenial na nxisin të reflektojmë për jetën e përtejme, për pafundësinë. Njeriu kërkon
kuptimin e jetës dhe gjen shpresën e sigurtë jo vetëm për vete, por për mbarë njerëzimin.