Dialog me Islamin në Indonezi: dëshmia e një misionari saverian
Indonezia është vendi më i populluar mysliman në botë, por aty jeton edhe një bashkësi
katolike, mjaft aktive. Misionarë të shumtë impenjohen çdo ditë në dialogun me kulturat
e ndryshme, që bashkëjetojnë në këtë vend aziatik. Atë Mateo Rebeki, meshtar saverian,
që prej 14 vjetësh në Indonezi, merret me formimin e të rinjve. Ja ç’na tregon për
misionin e tij: Jam dërguar fillimisht në ishujt Mentauai, një arkipelag i
vogël në perëndim të ishullit të Sumatrës, ku misioni është i tipit tradicional, një
mision në pyll, ku mungon pothuaj gjithçka. Në kohën kur kam ardhur unë, mungonte
telefoni, elektricitet kishte vetëm në mbrëmje, komunikimi ishte i vështirë, duhej
kaluar deti për të shkuar në Sumatra e lidhjet me qendrat më të rëndësishme të Indonezisë
ishin shumë të rralla. Kultura e vendit ishte akoma tradicionale. Ç’do të
thotë ta jetosh fenë në një ambient të tillë? Më kujtohet një udhëtim, gjatë
të cilit eca pesë orë në llucë e për një çast, thashë me vete: po për çfarë po shkoj
këtu? Kremtova meshën për 15 vetë, në një fshat, pas një udhëtimi shumë të vështirë
dhe e pyesja veten ç’kuptim kishte e gjithë kjo. Por pikërisht në atë fshat kuptova
se kisha shkuar të kremtoja meshë, sepse Zoti i donte ata njerëz, ashtu si më do edhe
mua. Prandaj, kjo marrëdhënie dashurie me Hyjin ishte motivacioni i misionit e justifikonte
lodhjen time. Ju jeni transferuar në Xhakartë e tani merreni me formimin e
të rinjve… Xhakarta është metropol me rreth 15 milion banorë, nuk dihet saktësisht
sa njerëz banojnë këtu. Prandaj, ndryshimi ka qenë mjaft i madh. Por, këtu Hyji më
ka dhënë një dhuratë të re: marrëdhëniet me myslimanët. Vërtet, këtu në Indonezi,
akoma jetohet në një atmosferë bashkëpunimi e tolerance, ka mundësi për dialog. Ka
shumë grupe, që punojnë për dialogun ndërfetar e bashkëpunojnë në mbrojtjen e të drejtave
të njeriut. Këtë vit kemi programuar një sërë takimesh të përmuajshme me personalitete
myslimane, që vijnë t’u flasin seminaristëve tanë. Shohim se ata janë të kënaqur,
vijnë me dëshirë, krijojnë marrëdhënie e bashkëpunime. Është një atmosferë e bukur,
dhuratë e Zotit, sidomos për mua, që nuk e njihja Islamin e myslimanët. Gjëja më e
mirë që kam gjetur këtu në Indonezi është bukuria e marrëdhënieve. Njerëzit janë akoma
të gatshëm për të krijuar marrëdhënie vëllazërore. E vëllezërit e mi janë të krishterë,
myslimanë e të feve të tjera, të gjithë, të dashur nga Zoti. Uroj që ky Vit i Fesë
të na ndihmojë të reflektojmë e të bindemi gjithnjë e më shumë se dashuria e Hyjit
është e pafundme për secilin prej nesh.