Më 3 shkurt, Kisha Katolike kremton të dielën e katërt gjatë vitit kishtar
e, po me 3 shkut kalendari kujton shën Vlashin, ipeshkëv i Sebastes e martir, shën
Ansgarin, ipeshkëv i Hamburgut dhe i Bremës, apostull i Skandinavisë. Është dita në
të cilën meditojmë për mrekullinë e shën Vlashit, i cili shpëtoi një fëmijë nga mbytja,
pasi kishte gëlltitur një halë peshku, që i kishte mbetur në fyt. Sot, vihen dy qirinj
të kryqëzuar në fyt, për të kërkuar mbrojtjen hyjnore të shenjtit.
Të hënën,
më 4 shkurt, ndër të tjera, kremtohet festa liturgjike e shën Gjilbertit dhe e
shën Jozefit nga Leonesa. Ungjilli na tregon për të djallosurin e shpëtuar nga Jezusi,
i cili e shndërroi në një lajmëtar të mrekullive të Zotit kundër së keqes. Forcojeni
zemrën, ju që shpresoni në Hyjin.
Ditën e martë, më 5 shkurt, Kisha
Katolike përkujton shën Agatën, apo Agen o Agetinën. Dy femra, njëra e vajzë e vogël,
në prag të vdekjes e, tjetra, grua me një sëmundje, prej së cilës i vinte turp: këto
na paraqet Ungjilli i kësaj dite. Të dyja provojnë pushtetin e dashurisë së Zotit,
që i kthen në jetë. Do të thurin lavde o Zot, ata që të kërkojnë, këndon psalmisti.
Më
6 shkurt, të mërkurën e ardhshme, kremtohen shën Pal Miki me shokë, të gjithë
martirë e shën Dorotea, virgjër e martire. Fjala e Jezusit në sinagogë, na kujton
Ungjilli i Shën Markut, i habit bashkëkohësit e vëllezërit në fe. Megjithatë, shumë
nuk e besojnë e madje e përbuzin. Por dashuria e Zotit fiton gjithmonë.
Të
enjten, më 7 shkurt, bie festa liturgjike e shën Rikardit dhe të Lumit Piu IX,
papë. Ungjilli i ditës na kujton detyrat, që u dha Krishti dishepujve të vet: t’i
kthejnë njerëzit në fe, të shërojnë të sëmurët duke i vojuar, të përzënë shpirtrat
e ndyrë e të nisen në mision vetëm me sandalet e me një palë petka, pa bukë, pa strajcë,
pa para me vete. Dha kështu imazhin e Kishës së ardhshme.
Më 8 shkurt, ditën
e premte, Kisha Katolike kujton shën Jozefinën Bakita, virgjër dhe shën Jeronimin
Emiliani, themelues i somaskëve, pajtor i jetimëve dhe i fëmijëve të braktisur. Në
Ungjill tregohet vdekja e Gjon Pagëzuesit, pararendësit të Krishtit. Zoti është drita
e shpëtimi im: reflekton psalmisti.
Të shtunën e ardhshme, më 9 shkurt,
kremtohen shën Apolonia, virgjër e martire dhe shën Sabini. Jezusi shumëzon bukët
e peshqit për të dëshmuar se Zoti është Bariu i të gjithëve e me Të, nuk na mungon
asgjë.
E diela e ardhshme, e pesta gjatë vitit kishtar, është edhe e
fundit para Krezhmëve. Kalendari kujton shën Skolastikën, virgjër, motër e shën Benediktit,
dhe shën Silvanin. Kisha përgatitet të kremtojë festën e Zojës së Lurdës, që bie të
nesërmen, më 11 shkurt, e duke pasur parasysh se njëkohësisht, bie Dita e të Sëmurit,
u thotë besimtarëve, me fjalët e Krishtit: “Shko, e bëj edhe ti kështu”, duke u kërkuar
të ndihmojnë pikërisht të sëmurët.