ԱՄՆ Քալիֆորնիա նահանգի Փասատենա քաղաքին մէջ Հայոց Ցեղասպանութեան Յուշակոթողի ճարտարապետական
նախագծման համար յաղթող հանդիսացած է Արուեստի կեդրոնի` ձեւաւորման քոլեճի ուսանողուհի
Քեթրին Մենարտ: Այս մասին կը տեղեկացնէ Aysor-ը՝ վկայակոչելով “Los Angeles Times” պարբերականը:
Հայոց Ցեղասպանութեան զոհերու յիշատակի կոմիտէն գովանաբանած է անոր կողմէ ներկայացուած
նախագիծը` զայն անուանելով “զգացական, ազդեցիկ նախագիծ”, որ պիտի ոգեշնչէ գալիք սերունդը: Քեթրին
Մենարտ-ի ձեւաւորման նախագիծի առանձնայատկութիւնը անոր քարէ աւազանի մէջ կանգնեցուած
եռոտանի կառոյցն է, որուն վերի մասէն, իւրաքանչիւր երեք վայրկեանին կիյնայ արցունքի
կաթիլ մը , որ կը խորհրդանշէ Հայոց Ցեղասպանութեան ժամանակ զոհուածներէն իւրաքանչիւրի
կեանքը: Մէկ տարուան ընթացքին 1.5 միլիոն արցունք պիտի թափուի աւազանին մէջ, եւ այդ
թիւը կը խորհրդանշէ 1915-էն մինչեւ 1918 Օսմանեան կայսրութեան կողմէ 1.5 միլիոն Հայերու
Ցեղասպանութիւնը: