Նախագահ Մուրսի Կը Վերարծարծէ Ազգային Երկխօսութիւնը՝ Մինչ Եգիպտական Բանակի Սպայակոյտի
Պետը «Պետութեան Փլուզում»-էն Կը Զգուշացնէ։
Եգիպտական բանակի սպայակոյտի պետ զօր. Ապտուլֆաթթահ Սիսի երէկ զգուշացուց, որ ներկայ
քաղաքական տագնապը «կրնայ պետութեան փլուզման առաջնորդել»: Ան բանակի Դիմատետրի էջին
վրայ զետեղուած խօսքի մը մէջ յայտնեց, որ այդպիսի փլուզում մը կրնայ «ապագայ սերունդները
վտանգել»: Սպայակոյտի պետը այդ զգուշացումը կատարեց Սուեզի ջրանցքի երկայնքին կրակմարի
դրութեան տակ գտնուող երեք քաղաքներու մէջ բանակային մեծ ուժի մը տեղակայումէն ետք: Երկուշաբթիէն
երեքշաբթի լուսցող գիշերուան ընթացքին Փորթ Սայիտի, Իսմայիլիայի եւ Սուեզի մէջ հազարաւորներ`
անտեսելով հաստատուած կրակմարը, փողոց դուրս եկան: Երեքշաբթի օր ցուցարարները դարձեալ
Փորթ Սայիտի մէջ փողոց դուրս եկան` մասնակցելու համար քաղաքին մէջ արձանագրուած վերջին
զոհերու յուղարկաւորութեան: Ընդդիմութիւնը մերժած էր Եգիպտոսի նախագահ Մոհամետ Մուրսիի
երկխօսութեան հրաւէրը: Եգիպտոսի նախագահական նախկին թեկնածու Ապտել Մընհեմ Ապուլֆութուհ
սէուտական «Օքազ» օրաթերթին յայտնեց, որ «նախագահ Մուրսիի հետ տարակարծիք ենք, սակայն
Եգիպտոսի մէջ ազգային երկխօսութիւնը այլընտրանք չունի»: Իսկ «6 ապրիլ-ժողովրդավարական
ճակատ»-ի գործավարը յայտարարեց, որ «ցոյցերուն մասնակից ենք, եւ մեր նպատակը «Իսլամ եղբայրներու
պետութեան» տապալումն է»: Նշենք, որ Եգիպտոսի մէջ վերջին երեք օրերուն ընթացքին արձանագրուած
են 47 զոհեր եւ 1611 վիրաւորներ: