Святы Пасад і Ізраіль асягнулі значны прагрэс у перамовах
Святы Пасад і Ізраіль
правялі 29 студзеня двухбаковую сустрэчу, падчас якой адбылося “сур’ёзнае і канструктыўнае”
абмеркаванне эканамічных і падатковых пытанняў адносна Каталіцкага Касцёла ў Святой
Зямлі. У сумеснай заяве Двухбаковай пастаяннай рабочай камісіі гаворыцца аб “значным
прагрэсе” у імкненні да заключэння пагаднення. Дэлегацыю Святога Пасаду ўзначаліў
падсакратар па адносінах з дзяржавамі кс. прэлат Этторэ Балестрэра.
Ізраільскія
СМІ паведамляюць, што бакі дасягнулі прарыву ў перамовах, якія працягваюцца з 1999
г. і не выключана, што на наступным пасяджэнні камісіі, якое адбудзецца летам у Ватыкане,
ужо будзе складзены выніковы варыянт пагаднення. Сярод іншага, Ізраіль пагадзіўся
вызваліць ад выплаты падаткаў касцёльныя ўстановы, якія не займаюцца эканамічнай дзейнасцю.
Таксама было дасягнута пагадненне аб тым, што касцёльныя землі ў Капернауме, на Гары
Благаслаўленняў, каля касцёла Звеставання ў Назарэце і яшчэ ў двух месцах не будуць
адчужаны для правядзення інфраструктурных работ. У той жа час, пры ўзгадненні са Святым
Пасадам, яны могуць быць выкарыстаны ў мэтах забеспячэння грамадскай бяспекі ў крызісных
сітуацыях. Пытанне адчужэння касцёльных зямель у іншых месцах, паводле ізраільскіх
медыя, усё яшчэ застаецца адкрытым.