Штогадовая акцыя па
збору сродкаў на дапамогу Касцёлу ў Цэнтральнай і Усходняй Еўропе будзе праведзена
ў большасці парафій ЗША 13 лютага, у Папяльцовую сераду. Сабраныя сродкі будуць накіраваныя
на душпастырскія, асветніцкія і будаўнічыя праекты у краінах, якія некалі знаходзіліся
“пад савецкім кантролем”, паведамілі ў субкамітэце епіскапату Злучаных Штатаў па дапамозе
Касцёлу ў Цэнтральнай і Усходняй Еўропе. Сёлетняя акцыя носіць назву “Аднаўляючы Касцёл,
будуем будучыню”. У гэтым годзе асаблівы акцэнт падчас дапамогі будзе пакладзены на
ўмацаванне каталіцкай адукацыі і інтэлектуальнага жыцця, семінарыйную фармацыю і выхаванне
новых лідэраў.
Епіскапат ЗША ужо на працягу доўгіх гадоў дапамагае Касцёлу
ў 27 краінах Еўропы, у якіх, “хоць і назіраецца эканамічны прагрэс, многія дыяцэзіі
застаюцца ў беднасці, якая з’яўляецца наступствам камунізму. Узнікшыя праблемы, звязаныя
з секулярызмам, вызначылі запатрабаванасць у буйных інвестыцыях, звязаных з выхаваннем
наступнага пакалення кіраўнікоў Касцёла”, - адзначаецца ў заяве Канферэнцыі Біскупаў
Злучаных Штатаў. У некаторых краінах рэгіёну зноў паўсталі пагрозы для свабоды веравызнання,
а павольнае аднаўленне эканомікі ў рэгіёне перашкаджае здольнасці Касцёла выконваць
сваю душпастырскую місію, адзначылі біскупы ў звароце да амерыканскіх вернікаў.
У
2012 г. амерыканскім епіскапатам было выдаткавана 5,9 млн. долараў ЗША ў выглядзе
грантаў у 24 з 27 краін Цэнтральнай і Усходняй Еўропы для падтрымання шырокага спектру
душпастырскіх і будаўнічых праектаў. Сума сабраных у мінулым годзе сродкаў вырасла,
нягледзячы на неспрыяльныя эканамічныя ўмовы ў ЗША.