Lirohen Gao e Timbuktu, ndihma ndërkombëtare për Malin
Franca dhe aleatët e saj afrikanë po fitojnë betejën në Mali. Pohimi është i presidentit
francez, Fransua Holandë, pas kalimit të qyteteve Gao e Timbuktu nga duart e islamistëve
integralistë në ato të francezëve. Tani, u takon forcave afrikane të çojnë para gjyqit
terroristët, në veri të vendit, për t’i dhënë Malit qëndrueshmëri politike. Ndërkaq,
fillojnë llogaritë e fondeve të nevojshme për të përmirësuar situatën, por numërohen
edhe viktimat e dëmet. Për të vazhduar deri në fund luftën kundër integralistëve,
nevojiten 460 milion dollarë. Bashkimi Afrikan vë në dispozicion 50 milion, ndërsa
Fondi Monetar Ndërkombëtar, diçka më shumë se 18. Luftimet në Gao, qyteti më i madh
në verilindje të Malit, kanë shkaktuar vdekjen e 25 islamistëve, gjatë orëve të fundit,
ndërsa në Timbuktu, qytet i njohur kulturor, xhihadistët kanë shkatërruar ç’u ka dalë
përpara. Kur e panë se po u vinte fundi, dogjën një bibliotekë, ku ruheshin dorëshkrime
të rralla, me karakter fetar e shkencor, të cilat u zhdukën një herë e përgjithmonë.
Patën bërë copë-copë edhe shumë shtatore të Alfarukut, engjëllit mbrojtës të qytetit
e, pastaj, shumë mauzoleume ndërtuar me rërë e dru, që zbukuronin Timbuktunë. Ndoshta
edhe për këtë, hyrja e ushtarëve francezë dhe malianë u prit me brohoritje e gëzim
të madh nga popullsia.