Koncili II i Vatikanit, sipas ditareve të kardinalit Tuçi
“Përgatitja e Koncilit II të Vatikanit, në ditaret e kardinalit Tuçi”: ky ishte argumenti
i një konference, që u zhvillua këto ditë në Romë, në selinë e revistës së njohur
të jezuitëve “Qytetërimi Katolik”. Dokumentet janë botuar kohët e fundit. Për vlerën
historike të tyre diskutuan atë Françesko Oketa, jezuit, Alberto Meloni, historian
dhe Xhuliano Amato, ish-kryeministër i Italisë. Kujtojmë se, në kohën e Koncilit
II të Vatikanit, kardinali Roberto Tuçi ishte drejtor i revistës “Qytetërimi Katolik”,
së cilës iu kërkua nga Papa Gjoni XXIII të ndiqte hap pas hapi punimet, ashtu siç
kishte bërë edhe me Koncilin I të Vatikanit. Më vonë, jezuiti do të bëhej drejtor
i përgjithshëm i Radio Vatikanit dhe organizator i udhëtimeve apostolike të Papës.
Qe pikërisht Ati i Shenjtë, Karol Vojtila, ai që e krijoi kardinal në vitin 2001.
Kujtesë e gjallë e historisë së Kishës, kardinali Tuçi pasqyron në ditare si filloi
Koncili, si u përgatit, shpjegon gjithçka, flet me fjalët e Papës Gjoni XXIII, vë
në dukje aspekte jo zyrtare, që nuk gjenden askund tjetër: çfarë i thoshte Papa, si
e priste, si e përcillte, komentet që bënte, anekdotat, që tregonte… Nga kjo
pikpamje, ditaret janë interesante edhe për të kuptuar më mirë personalitetin e Gjonit
XXIII, përveçse për t’u njohur me zanafillën e ideve e të mendimeve, që çuan në vendimet
e reja të Kishës në fushën e teologjisë e të baritorisë.