Երուսաղէմի Հայոց Պատրիարք Դառնալու Հինգ Թեկնածուները։

Երուսաղէմի Հայոց Պատրիարքարանին մէջ Չորեքշաբթի, Յունուար 23ին ընտրուած են պատրիարքութեան հինգ թեկնածուները:
«Արմէնփրէս»ի թղթակից եւ Սրբոց Յակոբեանց միաբանութեան անդամ հայր Կորիւն վարդապետ Բաղդասարեանը կը տեղեկացնէ, թէ գաղտնի քուէարկութեամբ ընտրուած են Երուսաղէմի Հայոց պատրիարքարանի լուսարարապետ Նուրհան արք. Մանուկեանը (21 ձայն), պատրիարքի տեղապահ Արիս արք. Շիրվանեանը (16), Պրազիլի Հայոց թեմի առաջնորդ Տաթեւ արք. Ղարիբեանը (18), Սրբոց Յակոբեանց միաբանութեան անդամ Սեւան արք. Ղարիբեանը (15) եւ Արժանթինի Հայոց թեմի առաջնորդ Գիսակ արք. Մուրատեանը (15):
Երուսաղէմի Հայոց Պատրիարքի ընտրութեան մասնակցելու իրաւունք ունին միայն միաբանութեան կուսակրօն անդամները՝ 33 հոգեւորականներ :
Պատրիարքի վերջնական ընտրութիւնը պիտի կայանայ երկու հանգրուանով: Առաջին հանգրուանին, գաղտնի քուէարկութեամբ կ՛ընտրուին հինգ թեկնածուներ: Համաձայն Երուսաղէմի Ուխտի կանոնադրութեան (1882)՝ Պատրիարքի թեկնածու կրնան ըլլալ Սրբոց Յակոբեանց Միաբանութեան մէջ 35 տարի ամբողջացուցած վարդապետներ ու եպիսկոպոսներ:
Ընտրութեան երկրորդ հանգրուանին, պատրիարք կ՛ընտրուի հինգ թեկնածուներէն մէկը՝ ձայներու բացարձակ մեծամասնութեամբ (կէսէն աւելի), իսկ պատրիարքի գահակալման օրը կ՛որոշուի ընտրութենէն ետք:
Յունուար 25ին, պատրիարքարանին մէջ կանոնադրական բարեփոխումներու մասին ժողով մը պիտի գումարուի:
Երուսաղէմի պատրիարքի աթոռը թափուր կը մնայ լուսահոգի Թորգոմ արք. Մանուկեանի (1990-2012) վախճանումէն ի վեր։