Арцыбіскуп Чэллі: сацыяльныя сеткі радыкальна змянілі працэс евангелізацыі
Рашэнне Бэнэдыкта
XVI прысутнічаць у сацыяльных сетках мае на мэце зрабіць іх больш гуманнымі і ператварыць
у “арэапаг трэцяга тысячагоддзя”, на якім трэба абвяшчаць Евангельскае слова, сказаў
арцыбіскуп Клаўдыё Марыя Чэллі, старшыня Папскай рады па сродках масавай камунікацыі.
Іерарх спаслаўся на тэму 47-га Сусветнага дня сродкаў камунікацыі: “Сацыяльныя сеткі:
дзверы праўды і веры. Новыя прасторы для евангелізацыі”, які будзе адзначацца 12 мая.
Мэта сёлетняга Дня – звярнуць увагу на тое, што прысутнасць у сацыяльных сетках павінна
быць момантам праўды пра Бога і чалавека, каб адносіны, якія наладжваюцца ў іх і праз
іх спрыялі развіццю чалавечых якасцяў, - адзначыў арцыбіскуп Чэллі ў інтэрв’ю сённяшняй
“L’Osservatore Romano”. На яго думку, тут сур’ёзна могуць дапамагчы твіт-паведамленні
Святога Айца. “Гэта “кроплі расы”, якія могуць наталіць смагу праўды і любові чалавека,
які вандруе часта ў адзіноце па сваім шляху ў гісторыі”, - адзначыў старшыня ватыканскай
дыкастэрыі.
Арцыбіскуп падкрэсліў, што новыя сродкі камунікацыі радыкальна
змянілі спосаб евангелізацыі, аднак яе змест застаецца нязменным у любой сітуацыі.
“Новыя тэхналогіі даюць толькі большыя магчымасці, але працэс евангелізацыі далей
звязаны са сведчаннем Евангелля, з супольнасцю, якая яго прымае”,- адзначыў іерарх.
Канешне, новыя сродкі камунікацыі дапамагаюць у пашырэнні прасторы евангелізацыі,
аднак застаецца істотным асабісты ўдзел у гэтым працэсе, і таму шматлікія сродкі могуць
быць карыснымі ў дасягненні гэтай мэты, дадаў ён. Па словах арцыбіскупа, з дапамогай
сучасных тэхналогій мы павінны навучыцца даходзіць да розуму і сэрца сённяшняга чалавека,
і толькі гэта мае значэнне.
Старшыня Папскай рады па сродках масавай камунікацыі
адзначыў, што Святы Пасад ужо на працягу доўгага часу з увагай назірае за лічбавай
культурай і спрабуе выкарастоўваць яе, вынікам чаго сталі шматлікія ініцыятывы, апошняя
з якіх – “Твітэр” Папы. Асноўным заданнем, па словах арцыбіскупа Чэллі, застаецца
імкненне, каб праз гэтыя каналы словы Святога Айца дайшлі да тых, хто не мае іншых
магчымасцяў пачуць іх.