Në Jordani, u mbajtën sot zgjedhjet e parakohshme politike, të cilat u bojkotuan nga
opozita, që i kërkon mbretit Abdallah reforma të thella demokratike. Pjesëmarrja në
votime është e ulët. Partia e “Vëllezërve Myslimanë” manifestoi deri dje kundër zgjedhjeve.
Ndikimi i ngjarjeve në Siri është i fuqishëm në vendin, që ka zgjedhur të ecë në rrugën
e të moderuarve. Por, ardhja e refugjatëve nga Siria dhe gjendja në vendet fqinjë
u kanë dhënë dorë islamistëve, të cilët po përpiqen të shtien në dorë pushtetin edhe
në Jordani. Të dëgjojmë gazetarin italian Xhorxho Bernardeli, ekspert i Lindjes së
Mesme: Në këto zgjedhje ka rëndësi sa do të shkojnë vërtet për të votuar. Duhet
të kemi parasysh se ky votim bëhet pasi u mbushën sheshet me protestat e nëntorit
kundër rritjes së çmimeve, sidomos të karburantit. Gjendja është e veçantë edhe për
shkak të pranisë së mbretit, i cili e ka udhëhequr Jordaninë, pa u kundërshtuar. Manifestimet
e vunë në diskutim rolin e tij. Zgjedhjet i ka kërkuar vetë mbreti, duke shpërndarë
para afatit parlamentin e duke premtuar reforma politike më demokratike. Duhet parë
sa jordanezë do të duan të ndjekin akoma këtë rrugë të moderuar e sa do të dëgjojnë
thirrjet e forcave islamiste.