Kombet e Bashkuara kanë bërë thirrje për qetësi në Luginën e Preshevës, pas heqjes
së lapidarit të Ushtrisë Çlirimtare të Preshevës, Medvegjës dhe Bujanocit nga ana
e xhandarmërisë serbe. "Kombet e Bashkuara përcjellin zhvillimin e situatës në Luginë
dhe bëjnë thirrje për qetësi", ka deklaruar Martin Nesirki, zëdhënës i sekretarit
të përgjithshëm të OKB-së, Ban Ki-Moon. "OKB-ja vazhdimisht ka theksuar nevojën e
pajtimit ndërkombëtar dhe rajonal në Ballkanin Perëndimor", ka shtuar Nesirki. Xhandarmëria
serbe, me urdhër të Qeverisë ne Beograd, ka larguar të dielën lapidarin e ushtarëve
të rënë të UÇPMB-së, i cili ndodhej para Kuvendit Komunal në Preshevë. Një gjë e tillë
ka nxitur protesta në këtë vend, por edhe reagimin e autoriteteve, si shqiptare ashtu
edhe ndërkombëtare. Lapidari u kushtohej shqiptarëve që luftuan për më shumë të
drejta në Luginën e Preshevës. Konflikti ndërmjet kryengritësve shqiptarë dhe forcave
qeveritare serbe ka marrë fund në maj të vitit 2001, me ndërhyrjen e komunitetit ndërkombëtar.
Autoritetet serbe e konsiderojnë UÇPMB-në si "organizatë terroriste. Agjencite
e lajmeve njoftojne se forca të mëdha të xhandarmerisë serbe vazhdojnë të qëndrojnë
të stacionuara në zonën e gjerë të Preshevës, pas aktit vandal të heqjes së lapidarit
të UÇPMB-së. Banorë lokal i kanë thënë agjencisë së lajmeve INA se prania e shtuar
e forcave serbe vijon në këtë zonë, kryesisht në zonën me kufirin me Kosovën, ku janë
shtuar lëvizjet e njësiteve të xhandarmerisë. “Në zonën malore ku kam shtëpinë
tashmë është rrezik për të lëvizur, për shkak të pranisë së shtuar të xhandarëve dhe
kjo na rrezikon edhe neve jetën, për shkak se në këtë situatë nuk i dihet dhe mund
të pësosh”, theksoi një banor nga fshati Caravajkë i komunës së Preshevës. Banorët
theksojnë se ndjejnë frikë nga kjo prani e shtuar dhe se apelojnë që të reagohet urgjentisht
që Serbia të tërheq këto njësite speciale nga kjo zonë, për të krijuar lëvizjen e
lirë të qytetarëve. Në deklaratën e përbashkët të liderëve politik, ndër pikat kryesore
është edhe tërheqja e njësiteve speciale dhe të xhandarmerisë serbe nga rajoni i gjerë
i Luginës së Preshevës. “Kërkojmë nga qeveria e Beogradit që urgjentisht të liroj
logjikën e dhunës, ultimatumeve dhe arbitraritetit në komunikim me shqiptarët, konform
kësaj largimin e forcave speciale,nga Lugina e Preshevës dhe përmbushjen e obligimeve
ndërkombëtarisht të marra ndaj shqiptarëve të Luginës së Preshevës, duke përfshirë
këtu edhe marrëveshjen e Konçulit”, theksohet në deklaratë. Dy ditëve të fundit
janë shmangur edhe lëvizjet e shtuara të njësiteve të xhandarmerisë përskaj rrugës
kryesore të qytezës së Preshevës, por dëshmitarë okularë kanë parë lëvizje të shtuara
të makinave civile të shërbimeve policore serbe, të cilët po ndjekin në hollësi situatën
në Preshevë. Pas protestës së djeshme të shqiptarëve të Luginës është miratuar një
deklaratë e përbashkët përmes së cilës kërkohet vëmendje ndaj shqiptarëve në këtë
rajon dhe ndërprerjen e masave represive serbe, që kulmuan me heqjen e monumentit
historik të shqiptarëve që përkujtonte dëshmorët e UÇPMB-së.