Kryeipeshkvi i Akrës: islami integralist, në rritje në Afrikë, por Evropa nuk e mbron
kontinentin
Fondamentalizmi islamik në Afrikë është në rritje. Nga vendet arabe, ai po përhapet
në pjesën tjetër të kontinentit, nga Nigeria në Somali e në Mali. Kisha Katolike është
thellësisht e shqetësuar, siç pohon, në mikrofonin tonë, kryeipeshkvi i Akrës, në
Gana, imzot Çarls Palmer-Bakëll: Deri në shekullin e kaluar, kemi bashkëjetuar
paqësisht me islamizmin afrikan, sepse në të nuk kishte fondamentalistë. Që prej dhjetë
vjetësh, shumë myslimanë kanë shkuar për studime në Arabinë Saudite, në Egjipt, në
Kuvajt, në Libi e në Iran e tani, po sjellin brenda islamizmit afrikan fondamentalizmin,
i cili u krijon probleme vetë myslimanëve, por edhe gjithë kontinentit afrikan. E
integralistët po fillojnë të bashkëpunojnë me terroristët jashtë Afrikës. Si
e vlerësoni rolin e fuqive perëndimore në Afrikë? Në të vërtetë, duhet të them
se jam i zhgënjyer nga fuqitë perëndimore. Për shembull, tani Franca impenjohet në
Mali. Do të doja ta pyesja: cili është qëllimi i vërtetë i ndërhyrjes ushtarake? Mos
vallë, kolonizimi i ri? Fatkeqësisht, Franca pati ndërhyrë edhe në Bregun e Fildishtë,
por i pamë rezultatet. Vendi nuk ka paqe e nuk do ta ketë edhe për 25 vjet të tjera,
sepse plagët, që duhej të mbylleshin, që duheshin mjekuar, janë akoma të hapura! Kur
shoh si ndërhyjnë vendet evropiane, kur vendosin – për shembull – se nuk do t’i japin
më ndihma financiare atij apo këtij vendi, pyes: e bëjnë për t’i dhënë fund krizës
në atë shtet, apo për të krijuar një gjendje edhe më të vështirë, që e bën vendin
gjithnjë e më të varur nga Evropa? Prandaj, jam shumë i zhgënjyer nga Evropa: nuk
ia kam më besën, nuk mendoj se ka dëshirë ta ndihmojë Afrikën, të mbrojë të varfërit,
nevojtarët, të vuajturit. Madje, besoj se jo, nuk do!