Бэнэдыкт ХVI сустрэнецца з камуністычным лідэрам

22 студзеня Бэнэдыкт ХVI прыйме на спецыяльнай аўдыенцыі Генеральнага сакратара камуністычнай партыі В’етнама Нгуэна Фу Чонга. Аўдыенецыя для камуністычнага лідэра носіць выключны характар, звычайна Святы Айцец прымае на аўдыенцыях кіраўнікоў дзяржаў і ўрадаў, рэдка палітычных лідэраў. В’етнамскі палітык, абраны генсекам у 2011 г., у мінулым займаў адказныя пасады ў сваёй краіне, быў між іншым спікерам парламента. Яму 68 гадоў. Закончыў Ханойскі ўніверсітэт і навучаўся ў Савецкім Саюзе. В’етнам ніколі ў сваёй гісторыі не падтрымліваў поўных адносін з Апостальскай Сталіцай. З 1925 г. у Ханоі існавала Апостальская дэлегатура, якая не мела дыпламатычнага статусу. Пасля таго, як яе супрацоўнікі пад ціскам паўночна-в’етнамскіх камуністычных уладаў былі вымушаны пакінуць Ханой, у 1957 г. дэлегатура пачала сваю працу на поўдні краіны, у Сайгоне. Пасля заканчэння в’етнамскай вайны і захопу паўднёвага В’етнаму камуністамі, дэлегатура на доўгі час пакінула краіну. Толькі ў 2011 г., пасля шматлікіх сустрэч паміж прадстаўнікамі Святога Пасаду і В’етнама, было вырашана, што Апостальская Сталіца прызначыць свайго пастаяннага прадстаўніка па адносінах з гэтай краінай, які будзе мець сваю сядзібу па-за межамі В’етнама. Гэту функцыю Бэнэдыкт ХVI даручыў арцыбіскупу Леапольду Джырэллі.