Папа перад “Анёл Панскі”: грэх супраць адзінства нявечыць твар Касцёла (поўны тэкст)
Бэнэдыкт XVI у сваім
разважанні перад малітвай “Анёл Панскі” 20 студзеня заклікаў хрысціян да пераадолення
ўсіх канфліктаў і імкнення да поўнага і бачнага адзінства. На думку Святога Айца,
толькі такім чынам паслядоўнікі Хрыста змогуць даць адпаведны адказ на ўсе віды дыскрымінацыі
і несправядлівасці ў свеце. Пантыфік нагадаў, што ў Касцёле пачаўся Тыдзень малітвы
за адзінства хрысціян, час, калі паслядоўнікі Хрыста асаблівым чынам закліканы прасіць
Бога, паказаць шляхі да еднасці, і самі імкнуцца зразумець, на чым палягае гэта еднасць.
Папа выказаў смутак з прычыны таго, што яшчэ існуе шмат рознагалоссяў сярод хрысціян,
якія перашкаджаюць ім аб’яднацца і разам сведчыць пра Збаўцу. Ён звярнуўся з заклікам
маліцца за мір у свеце, што актуальна асабліва зараз, калі на ўсёй планеце ў розных
канфліктах гінуць безабаронныя асобы. Бэнэдыкт XVI заклікаў канфліктуючыя бакі “знайсці
ў сабе мужнасць уступіць у дыялог і перамовы”.
“Сёння літургія прапануе Евангелле,
якое апавядае пра вяселле ў Кане Галілейскай. - нагадаў Пантыфік - Аб гэтай падзеі
гаворыць Ян, сведка гэтага факту. Падзея гэта была змешчана ў літургіі нядзелі, якая
наступае непасрэдна пасля перыяду Божага Нараджэння, таму што разам з пакланеннем
трох Мудрацоў з Усходу і Хростам Езуса належыць да трылогіі Эпіфаніі або Аб’яўлення
Хрыста. Вяселле ў Кане на самой справе палажыла “пачатак знакам” (Ян 2,11), тут адбыўся
першы цуд Езуса, праз які Ён публічна засведчыў сваю хвалу, нараджаючы веру ў сваіх
вучнях. Коратка нагадаем, што адбылося на вяселлі ў Кане Галілейскай. Не хапала віна,
і Марыя, маці Езуса, звярнула на гэта ўвагу свайго сын. Ён адказаў, што яшчэ не надышла
Яго гадзіна, але потым споўніў просьбу Марыі, і, пасля напаўнення вадой шасці вялікіх
збаноў, ператварыў ваду ў віно, віно выдатнае, лепшае, чым папярэдняе. Праз гэты “знак”
Езус аб’яўляе сябе ў якасці месіянскага Жаніха, які прыйшоў, каб заключыць са сваім
народам новы і вечны Запавет, згодна са словамі прарокаў: “як жаніх радуецца нявесце,
так узрадуецца табою твой Бог” (Іс 62, 5). Віно з’яўляецца сімвалам радасці любові,
але яно сімвалізуе таксама кроў, якую Езус пралье ў канцы, каб прыпячатаць дамову
любові з чалавецтвам.
Касцёл – гэта нявеста Хрыста, Які сваёй ласкай робіць
яго святым і прыгожым. Тым не менш, гэта нявеста, што складаецца з чалавечых істот,
пастаянна мае патрэбу ў ачышчэнні. Адным з самых сур’ёзных грахоў, якія нявечаць твар
Касцёла, з’яўляецца грэх супраць яго бачнага адзінства, асабліва гістарычныя падзелы,
што раздзялілі хрысціян, і яшчэ не цалкам пераадолены. Менавіта ў гэтыя дні, з 18
па 25 студзеня, адбываецца штогадовы Тыдзень малітваў за адзінства хрысціян. Гэта
падзея заўсёды ахвотна перажываецца вернікамі і супольнасцямі, выклікаючы ва ўсіх
жаданне духоўнага ўдзелу ў справе поўнага адзінства. Вельмі важным у гэтым кантэксце
было малітоўнае чуванне, якое каля месяцу таму я перажываў разам з многімі тысячамі
маладых людзей з усёй Еўропы і экуменічнай супольнасцю з Тэзэ: гэта была падзея ласкі,
у якой мы атрымалі досвед прыгажосці будавання адзінства ў Хрысце. Я заклікаю ўсіх
вас маліцца разам, каб мы змаглі асягнуць тое: “Што Бог чакае ад нас” (пар. Міх 6,
6-8), як гаворыць тэма сёлетняга Тыдня, прапанаваная некаторымі хрысціянскімі супольнасцямі
Індыі. Яны заклікаюць да ўпэўненага імкнення да бачнага адзінства ўсіх хрысціян і
пераадолення, як браты ў Хрысце, усіх відаў несправядлівай дыскрымінацыі. У бліжэйшую
пятніцу, на заканчэнне гэтых дзён малітвы я ўзначалю Нешпары ў базыліцы св. Паўла
за Мурамі ў прысутнасці прадстаўнікоў іншых Цэркваў і касцёльных супольнасцяў.
Дарагія
сябры, да малітвы за адзінства хрысціян хацеў бы далучыць чарговы раз малітву за мір,
каб у розных канфліктах, якія, на жаль, маюць зараз месца, спыніліся забойствы безабаронных
грамадзянскіх асоб, спынілася рознага тыпу насілле і была знойдзена мужнасць уступіць
у дыялог і перамовы. У абодвух гэтых інтэнцыях будзем прасіць заступніцтва Найсвяцейшай
Панны Марыі, пасрэдніцы ласк”, - сказаў Папа падчас свайго разважання.
Як заўсёды,
пасля малітвы “Анёл Панскі”, Пантыфік звярнуўся да сабраных на плошчы св. Пятра пілігрымаў
з кароткімі прамовамі на некалькіх еўрапейскіх мовах. Бэнэдыкт XVI запрасіў усіх быць
вернымі Богу і любіць адзін аднаго, прызнаючы сябе братамі і сёстрамі ў Хрысце.