Арцыбіскуп Мюлер пра “інтымную сувязь” паміж дагматыкай і экзэгетыкай
Адным з пасланняў
апошняй кнігі Бэнэдыкта XVI, прысвечанай дзяцінству Езуса, з’яўляецца перакананне,
што Бога можна пазнаць у свеце і ў гісторыі, адзначыў арцыбіскуп Герхард Людвіг Мюлер.
Ён правёў аналіз твору Святога Айца на старонках сённяшняга выдання ватыканскай газеты.
На яго думку, Папа спрабуе аднавіць “інтымную сувязь адзінства” паміж дагматыкай і
экзэгетыкай і супрацьпастаўляе яе “дуалістычнай апазіцыі” рацыяналізму і эмпірызму
ў сучаснай філасофіі. Іерарх прызнае, што пазнанне чалавека “заўсёды мае гісторыка-эмпірычную
арыентацыю”, але ў той жа час заўсёды перавышае тое, што можа быць знойдзена “чыста
пазітывісцкім чынам”. Чалавек заўсёды адкрыты для трансцэндэнтнага ў кожнай рэальнасці,
перакананы прэфект Кангрэгацыі Веравучэння і вядомы тэолаг.
На старонках сваёй
кнігі Святы Айцец вельмі пераканаўча заяўляе, што “уцелаўленне Слова, і зачацце Езуса
як чалавека ад Духа Святога, гэта не міф, і тым больш, не біялагічны рарытэт, але
гістарычная праўда”, - звярнуў ўвагу арцыбіскуп Мюлер. Для таго, хто верыць, што Бог
мае ўладу над матэрыяй, няма праблемаў “разумна верыць” ва уцелаўленне Слова ў Панне
Марыі, ва ўваскрасенне цела Хрыста і перамену хлеба і віна ў Цела і Кроў Хрыста ў
таямніцы алтара, перакананы нямецкі тэолаг. “Калі некаторыя скептыкі пытаюцца мяне,
ці я сапраўды думаю, што Адзінародны Сын Божы быў зачаты ад Духа Святога і нарадзіўся
з Дзевы Марыі без дапамогі чалавека, то я кажу з упэўненасцю і без ваганняў, так,
таму што я веру ў Бога, у Якога няма нічога немагчымага”, - заявіў іерарх на старонках
“L’Osservatore Romano”.
Арцыбіскуп Мюлер лічыць, што часта ў людзей, якія
адмаўляюць факт, што Хрыстус нарадзіўся з Дзевы Марыі, існуе комплекс: яны баяцца
прызнаць, што Бог можа быць настолькі блізкі да людзей. Рэцэптам на гэты комплекс
можа быць толькі любоў. Калі такі чалавек пазнае любоў Бога да яго, страхі і асцярогі
знікаюць. Менавіта гэта, на думку прэфекта Кангрэгацыі Веравучэння, яшчэ адно з самых
галоўных пасланняў кнігі Святога Айца.