Պենետիկտոս ԺԶ Սրբազան Քահանայապետը Ընդունեց Իտալիոյ Պազիլիքադա Թեմերու Եպիսկոպոսները։

Ուրբաթ 18 Յունուարի առաւօտեան ժամը 11-ին Պենետիկտոս ԺԶ Սրբազան Քահանայապետը իր գրասենեակի մէջ ընդունեց Հաւատոյ Ժողովի Կառավարիչը գերապայծառ Կէրարտ Լուտվիկ Միւլլէր։ Ապա ժամը 11,30-ին Նորին սրբութիւնը ընդունեց Իտալիոյ եպիսկոպոսական համահաւաք դասի անդամ Պազիլիքաթա մարզի թեմերու 6 եպիսկոպոսներ որոնք Հռոմ ժամանած են իրենց հնգամեայ կանոնական այցելութիւնը կատարելու Սուրբ Պետրոսի յաջորդին։
Եպիսկոպոսներու խումբը կը գլխաւորեր գերապայծառ Ակոսդինօ Սուբէրնոն որ Պազիլիքաթա Մարզի եպիսկոպոսական համահաւաք դասի նախագահն է։
Յայտնենք որ Իտալիոյ Պազիլիքաթա շրջանը ունի 9,966 քմ քառակուսի տարածք եւ 599,453 բնակչութիւն։ Հոն կը գործեն 273 ժողովրդապետութիւններ ուր իրենց ծառայութիւնը կը մատուցեն 424 կուսակրօն քահանաներ որոնցմէ 89 թեմական։ Ասոնց կ՛աջակցին 37 մնայուն սարկաւագներ։
Ժամը 12,15 անց Պենետիկտոս ԺԶ Սրբազան Հայրը ունկնդրութիւն շնորհեց Վենեզուէլլայի համահաւաք դասի Նախագահական կազմի անդամներուն յանձինս` համահաւաք դասի նախագահ գերապայծառ Տիէկօ Րաֆայել Փատրոն Սանչէցի, փոխ նախագահներ` գերապայծառ Խոսէ Լուիս Ացույէ Աեալա եւ գերապայծառ Մարիօ Տէլ Վալլէ Մորոնթա Րոտրիկէզի ու ընդհանուր քարտուղար գերապայծառ Խէսուս Կոնզալէս Տէ Զարադէ Սալասի։

Հինգշաբթի 17 յունուարին Նորին Սրբութիւնը ընդունեց ֆինլանտայէն ժամանած 12 հոգիէ բաղկացած համամիութենական պատուիրակութեան մը։ Անոնց արտասանած իր ճառին մէջ Սրբազան Հայրը խրախուսեց Կաթողիկեներն ու Լուտերականները միասնաբար քալելու ''Աստուծոյ հաւատարմութեան նեղ ճանապարհի վրայ'' դիմագրաւելով ''բոլոր դժուարութիւններն ու խոչնդոտները''։