Papa kufizon zyrtarisht detyrën e Primatit të Irlandës

Benedikti XVI emëroi sot një ndihmës fuqiplotë për kryedioqezën metropolitane të Armagh, seli e Primatit të Irlandës. E ky vendim u mor sepse Primati, kardinali Shon Bredi, është ngatërruar në shkandullin e pedofilisë. Kujtojmë se, së bashku me ipeshkvin e tij të asokoshëm, Primati irlandez mbuloi me heshtje shpërdorimet e një meshtari, për sjelljen e të cilit qe i ngarkuar të hetonte.
Kardinali Bredi i pati kërkuar që më 2010 Papës të mos e ushtronte më detyrën e tij. E tani, në krye të kryedioqezës, vjen imzot Eamon Martin, i klerit të dioqezëss Derri, si kryeipeshkëv fuqiplotë. Imzot Martin deri tani ishte administrator dioqezan i së njëjtës dioqezë, nga e cila Papa lëvizi edhe ipeshkvin Hegarti, që gjithashtu heshti për priftërinjtë e ngarkuar me fajin e rëndë të shpërdorimit seksual mbi të miturit.Imzot Eamon Martin do ta zërë vendin e kardinalit Bredi vitin e ardhshëm, kur Primati do të mbushë moshën 75 vjeç.