Nunci apostolik në Serbi mendon se është ende shpejt për vizitën e Papës, por pohon
se po bëhen hapa përpara.
Tani për tani Papa nuk do ta vizitojë Serbinë, por ka nisur puna për kapërcimin e
pengesave, që e ndalojnë. Është ky pohimi, në agjencinë Sir, i nuncit apostolik në
vendin ballkanik, imzot Orlando Antonini. Ka probleme historike, pohoi imzot Antonini,
që nuk i krijojnë ende plotësisht kushtet për këtë vizitë. Por nuk mungojnë hapat
para. Një prej tyre, ishte hapja e kremtimeve për 1700-vjetorit të Ediktit të Milanos,
në Nish të Serbisë, me një koncert në Teatrin kombëtar. Kremtimi përkujtoi vendimin
jetik për krishterimin, me të cilin, në vitin 313, Perandori romak i dha fund persekutimit
të të krishterëve. Gjatë ceremonisë e morën fjalën presidenti serb, Tomislav Nikoliç
dhe Shenjtëria e tij Irenej, patrik i Kishës ortodokse serbe. Edhe nunci apostolik,
imzot Antonini, u drejtoi fjalën pjesëmarrësve në këtë ngjarje përkujtimore . E kjo,
së bashku me shumë të tjera, është një shenjë, që flet për shtendosjen e atmosferës.
U vlerësua shumë, për shembull, fakti se në Komitetin organizues të kremtimeve (kryesuar
nga presidenti serb e nga patriku Irenej) është i pranishëm si delegat i të gjithë
ipeshkvijve katolikë të Serbisë, kryeipeshkvi i Beogradit, imzot Stanislau Hoçevar. E
pasaj, është hera e parë që një përfaqësues i Selisë së Shenjtë e merr fjalën në një
ceremoni përuruese, si kjo e mbrëmshmja. Janë procese historike të gjata, shpjegon
nunci, por ne duhet të kemi besim, të njihemi më mirë, t’i thellojmë qëndrimet e
ndryshme e, sidomos, të sillemi me dashuri e ndjenja vëllazërore. Nyjat historike
nuk zgjidhen menjëherë. Kërkojnë kohë. Por sot mund të themi se po përpiqemi për zgjidhjen
e tyre. Në fjalën e mbajtur me këtë rast, nunci e vuri theksin kryesisht tek liria
fetare, e dekretuar për herë të parë në histori përmes Ediktit të Kostandinit, që
kërkoi t’i njihej menjëherë kjo e drejtë jo vetëm të krishterëve, por të gjithë besimtarëve.
Është fjala, shtoi imzot Antonini, për lirinë e ndërgjegjes, një fitore e madhe e
kulturës politike, etike e ligjore. Ishte, vijoi nunci, një ngjarje thelbësisht
e krishterë, sepse qenë të krishterët ata, që e detyruan pushtetin politik të pranonte
se të drejtat e njeriut vijnë para shtetit e se shteti duhet t’i njohë e t’i garantojë. Ngjarjet
kremtore, që nisën dje, do të vijojnë deri më 28 tetor. Kardinali Anxhelo Skola, kryeipeshkëv
i Milanos, do të marrë pjesë, më 21 shtator, në një shtegtim drejt Nishit, vendlindja
e Kostandinit, Perandorit të madh të Perendorisë romake, me të cilin nisa liria e
fesë për të gjithë besimtarët, banorë të një hapësire të pafundme, që shtrihej në
tre kontinente.