Filloi më 18 e do të përfundojë më 25 janar, Java e lutjes për bashkimin e të krishterëve,
e cila sivjet ka për temë një frazë të Mikesë profet: “Ç’kërkon Zoti prej nesh” (6,
6-8). Janë të krishterët e Indisë, ata që kanë përgatitur tekstet për edicionin 2013,
duke u përqendruar në gjendjen e vështirë e diskriminuese të dalitëve, apo të indianëve
jashtë kastave. Problemi nuk ka të bëjë vetëm me shoqërinë indiane në përgjithësi,
por edhe me vetë bashkësinë e krishterë, në dy kahe: ka anëtarë të saj, që i shohin
me përbuzje dalitët, por, nga ana tjetër, dalitët përqafojnë shpesh fenë e krishterë,
pikërisht sepse ajo predikon dashurinë e Zotit për të gjithë njerëzit, prandaj bashkësia,
ku marrin pjesë, vihet në shënjestër. Vetë indianët shkruajnë: “Ndarja ndërmjet
të krishterëve të Indisë theksohet edhe më shumë nga kastat. Ky është një fenomen,
që i vë përballë sfida të rëndësishme Kishës në Indi dhe dëshmisë së saj si korp i
vetëm i Krishtit”. Kisha Katolike e pyet veten, së bashku me Mikenë profet, se ç’kërkon
Zoti prej saj, në këtë situatë. Përvoja e dalitëve bëhet kështu burim reflektimesh
teologjike edhe mbi këtë temë biblike.