Արամ Ա. Կաթողիկոս Ընդունեց Իսլամ Կրօնականներու Համախմբումի Ներկայացուցիչները։
Երեքշաբթի, 15 յունուարի առաւօտուն, Արամ Ա. կաթողիկոս ընդունեց Լիբանանի Իսլամ կրօնականներու
համախմբումի վարչութիւնը, որուն մաս կը կազմէին սիւննի եւ շիի հոգեւորականներ: Հանդիպման
ընթացքին արծարծուեցան քրիստոնեայ-իսլամ համակեցութեան, կրօնի ընկերային ծառայութեան
եւ Լիբանանի ընտրական օրէնքին հետ առնչուած հարցեր: Յիշեալ հարցերուն առնչութեամբ վեհափառ
հայրապետը շեշտեց հետեւեալ կէտերը. 1) Անհրաժեշտ է աւելի ամրապնդել քրիստոնեայ-իսլամ
գործակցութիւնը Միջին Արեւելքի եւ յատկապէս Լիբանանի մէջ: Իսլամութեան ու քրիստոնէութեան
առաքելութեան շրջագիծին մէջ հասարակաց մտահոգութիւններ եւ մարզեր գոյութիւն ունին, ուր
գործակցութիւնը ո՛չ միայն կարելի է, այլ նաեւ` հրամայական: 2) Ընկերային ծառայութիւնը
թէ՛ քրիստոնէութեան եւ թէ՛ իսլամութեան առաքելութեան կարեւոր երեսներէն մէկն է: Կրօնը
ո՛չ միայն հոգեւոր եւ բարոյական արժէքներու քարոզիչը պէտք է դառնայ, այլ նաեւ ժողովրդային
ծառայութեան ճամբով այդ արժէքները պէտք է կենսագործէ ընկերութեան կեանքին մէջ: 3)
Անհրաժեշտ է այնպիսի ընտրական օրէնք մը մշակել, ուր համայնքները կարեւոր դեր ունենան
իրենց ներկայացուցիչներու ընտրութեան մէջ, ինչպէս նաեւ պահպանուի Լիբանանի ամբողջականութիւնը
եւ ներքին միասնականութիւնը: