Në Mali vazhdojnë bombardimet franceze. Rebelët marrin Konën
Në Mali vazhdojnë bomardimet franceze e qeveria e Parisit deklaron se numri i ushtarëve
të disllokuar në vendin afrikan do të rritet deri në 2500 vetë. Rebelët xhihadistë
kontrollojnë qytetin e Konës dhe kanë ndërprerë lidhjet me Gaon. Pritet ndërhyrja
e trupave të Bashkimit Ekonomik të Vendeve të Afrikës Perëndimore, ndërsa vetë Franca
dhe vendet e Këshillit të Sigurimit kërkojnë një forcë prej së paku 3.300 ushtarësh,
të dërguar nga OKB-ja. Nesër, në Bruksel do të mblidhet këshilli i jashtëzakonshëm
i ministrave të jashtëm të Bashkimit Evropian, i cili duket se do të orientohet drejt
shtypjes së islamistëve. Për një analizë të këtij skenari, të dëgjojmë ekspertin italian
për Afrikën, Arrigo Paloti, pedagog në Universitetin e Bolonjës: Ky skenar në
Mali është pasojë e rënies së regjimit të Gedafit në Libi. Në një kuadër historik
tensionesh të forta ndërmjet veriut e jugut të vendit, në çastin kur grupet e armatosura
Tuareg, që paguheshin nga Gedafi, ikin nga Libia e kthehen në Mali, shpërthen konflikti.
Fillimisht, ai kishte shtytje indipendentiste, por më pas, ndërhynë rrjete të lidhura
me terrorizmin ndërkombëtar dhe gjithë lëvizja mori tone më të ashpra e më të rrezikshme.
Ka konsensus për ndërhyrjen ushtarake të Francës, por ndërhyrje të tilla dihet kur
fillojnë, por jo kur mbarojnë.