Святы Пасад зацікаўлены
ў правядзенні “Дня юдаізму” на сусветным узроўні. “Мы заклікаем біскупаў адзначаць
гэты дзень”, - заявіў сакратар Камісіі Святога Пасаду па рэлігійных адносінах з юдаізмам,
нямецкі салезіянін, кс. Норберт Хофман 15 студзеня. Гэты дзень, які падкрэслівае юдэйскія
карані хрысціянства і садзейнічае хрысціянска-юдэйскаму дыялогу, 17 студзеня ўжо на
працягу некалькіх гадоў адзначаецца ў некаторых краінах. Ён не можа, аднак, быць ініцыяваны
“зверху”, рашэнне павінна быць пакінута мясцовым епіскапатам, заўважыў кс. Хофман,
бо адносіны паміж Касцёлам і юдаізмам у асобных краінах вельмі розныя.
17 студзеня
Каталіцкі Касцёл адзначыць “Дзень юдаізму” у шэрагу краін, у тым ліку Аўстрыі, Італіі,
Нідэрландах і Польшчы.
Паводле сакратара Камісіі, мэтай дыялогу з’яўляюцца
адносіны даверу паміж Касцёлам і юдаізмам у справе міру, справядлівасці і абароны
стварэння. Ён лічыць, што з часам можна пайсці яшчэ далей, у напрамку тэалагічнага
дыялогу.