Երեւանի Իրանական "Կապոյտ Մզկիթը" Պիտի Ընդունուի UNESCO-ի Մշակութային Ժառանգութեան
Ցանկին Մէջ։
Հայաստանը յառաջիկային պիտի ընէ հնարաւոր ամէն քայլ, որպէսզի Երեւանի մէջ գտնուող իրանական
Կապոյտ Մզկիթը ընդգրկուի UNESCO-ի մշակութային ժառանգութեան ցուցակին մէջ: Այս մասին
(ըստ Armenpress.am-ի) յայտնած է ՀՀ մշակոյթի նախարար Յասմիկ Պօղոսեան: Նախարարը չափազանց
կարեւոր համարած է այս գործընթացին իրականացումը, քանի որ 2012-ի աշնան, Իրանի Իսլամական
Հանրապետութիւն կատարած իր աշխատանքային այցը, հնարաւորութիւն տուած է իրեն տեղւոյն վրայ
շատ մօտէն ծանօթանալու հայկական պատմամշակութային ժառանգութեան պահպանութեան խնդիրներուն:
«Իրանն այն եզակի երկրներից է, որտեղ հայկական եկեղեցիների, դպրոցների եւ կրթամշակութային
օջախների նկատմամբ մեծ հոգածութիւն է ցուցաբերւում: Նրանք մեր յուշարձանները չափազանց
լաւ են պահպանում»,- ընդգծած է նախարար Պօղոսեան : Իրանի հիւսիսը գտնուող Սուրբ Թադեւոսի
վանքը UNESCO-ի մշակութային ժառանգութեան ցանկին մէջ ընդգրկուած է «Իրանի հայկական եկեղեցական
համալիրներ» ընդհանուր անուանակարգով: Իսկ ատիկա, նախարարի խօսքով, կը նշանակէ, որ իւրաքանչիւր
տարի ցանկերը կրնան համալրուիլ հայկական եկեղեցիներով: Կապոյտ Մզկիթը իսլամական միակ
աղօթատունն է Երեւանի մէջ: Անիկա կառուցուած է 1766-ին` Հուսէյն Խանի նախաձեռնութեամբ:
Մզկիթ կ’այցելեն Հայաստանի մէջ բնակող իսլամները: Կապոյտ Մզկիթը Կովկասի մէջ ամենամեծն
է: Անիկա պահպանուած է շնորհիւ Չարենցի, որ առաջարկած է կառոյցը վերածել թանգարանի: Այս
Մզկիթը կը համարուի Հայաստանի պատմական վայրերէն մէկը: Իբրեւ երկու ազգերու հանդուրժողական
ու ակնածալի վերաբերմունքի ապացոյց` մզկիթի ցուցասրահին մէջ Հայկական եկեղեցին եւ Պարսկական
Մզկիթը տեղադրուած են կողք կողքի: