Imzot Shakur: rrezikohet prania e të krishterëve në Tokën e Shenjtë
Ipeshkvijtë evropianë dhe veriamerikanë, në misionin e tyre në Tokën e Shenjtë prekën
me dorë vështirësitë e bashkësive të krishtera lokale. Për këto vështirësi, folëm
me kryeipeshkvin greko-melkit, imzot Elias Shakur, në mikrofonin tonë:
Përgjigje:
- Kriza vijon, që kur jemi bërë pakicë, domethënë me krijimin e shtetit të Izraelit.
E si pakicë, kemi probleme, që kërcënojnë vetë ekzistencën e palestinezëve të krishterë
si dhe praninë e tyre në Tokën e Shenjtë.
Pyetje: - Mund të na kujtoni
disa prej problemeve?..
Përgjigje: - Natyrisht. Po ju jap një shembull
shumë të thjeshtë. Kemi shkollat tona të krishtera në Izrael. Ministria e Arsimit
jep ndihma për fëmijët e të gjitha shkollave, me përjashtim të atyre, që ndjekin
shkollat e krishtera. Ne jo vetëm që na japin më pak se gjysmën e ndihmave, por vijojnë
t’i pakësojnë edhe më shumë. Rrezikohemi t’i mbyllim fare shkollat tona. E këto shkolla
nuk janë thjesht ‘mësonjëtore’: janë vende, ku të krishterët, myslimanët, drusët e
fëmijët e konfesioneve të tjera, mësojnë të jetojnë së bashku. Mendimi se kjo mund
të bëhet e pamundur, na pikëllon pa masë.
Pyetje: - Për të krishterët
e botës mbarë, Toka e Shenjtë vijon të mbetet vend tepër i rëndësishëm…
Përgjigje:
- Viset e Shenjta janë jashtëzakonisht të rëndësishme e u jam mirënjohës gjithë
të krishterëve, që kujdesen për to. Por ka ardhur koha të pyesim ç’kuptim do të kishin
Viset e Shenjta, pa të krishterë; ç’rëndësi kanë gurët e shenjtë të kësaj toke, në
se nuk janë më gurë të gjallë? U bëj thirrje të krishterëve të shtegtojnë në këto
vise. Ejani, pra, por mbasi të keni parë reliket, gurët, lashtësinë, takojuni edhe
me bashkësitë e krishtera lokale. Do të jenë të lum t’ju presin, të ndajnë me ju bukën
e kripën e zemrën. Nuk do t’ju kërkojnë para, por vetëm miqësi, solidaritet. Mendoj
se i meritojnë.
Për marrëdhëniet ekumenike në Tokën e Shenjtë të dëgjojmë imzot
Uiljam Shomalin, ipeshkëv-ndihmës i Patriarkanës latine të Jeruzalemit, në mikrofonin
tonë:
Pyetje: - Ju jeni ndihmës i ipeshkvit të Jeruzalemit: a mund të
na thoni diçka për situatën ekumenike në vend?
Përgjigje: - Bëjmë përpjekje
serioze me vëllezërit tanë ortodoksë, por edhe me anglikanët e luteranët, për të jetuar
së bashku, për t’u mbledhur, për të diskutuar së bashku problemet, që kanë të bëjnë
me Kishat tona. E bëjmë këtë çdo dy muaj, në Patriarkanën ortodokse. Këtu mblidhen
ipeshkvijtë dhe patrikët e diskutojnë. I nisim takimet tona me lutje. Kjo nuk ndodhte
më parë, por tani kemi ngulmuar, sepse kur takohen ipeshkvijtë, duhet të bëhet diçka
që bashkon; e s’ka gjë që të bashkon më shumë se lutja.
Pyetje: - Ç’mund
të na thoni për mundësinë e kremtimit të Pashkëve në të njëjtën ditë?
Përgjigje:
- Kemi unifikuar kalendarin e famullive tona në Izrael, Jordani, Qipro e edhe
në pjesën më të madhe të famullive palestineze. Ky është një hap para, edhe pse nuk
na kënaq plotësisht, sepse bashkësi të ndryshme të krishtera të Jeruzalemit e të Betlehemit
nuk e kanë pranuar këtë vendim: po e përsëris, është hap para, që e bëmë për të plotësuar
nevojat e njerëzve. Janë njerëzit, që bëjnë presion mbi klerin për t’i unifikuar Pashkët.
Në këtë mënyrë kemi unifikuar, së paku pjesërisht, Kohën e Kreshmëve e dhe Kohën e
Pashkëve: është fjala për njëqind ditë, që i kremtojmë së bashku.
Pyetje:
- … por jo në Jeruzalem e në Betlehem...
Përgjigje: - Me përjashtim
të Jeruzalemit të Betlehemit, për shkak të statusit të këtyre Viseve të Shenjta, por
edhe për fluksin e shtegtarëve, që vijnë të kremtojnë Pashkët tek ne. Përpiqemi të
plotësojmë edhe kërkesat e shtegtarëve.
Pyetje: - Ç’marrëdhënie keni
me myslimanët e me hebrenjtë?
Përgjigje: - Me përjashtim të një pakice
fanatikësh, mund të themi se myslimanët na respektojnë shumë. Ashtu edhe hebrenjtë,
e edhe në nivel të qeverive të ndryshme, të krishterët e praktikojnë krejt lirisht
fenë e tyre. E ndjejmë këtë respekt si nga ana e liderëve palestinezë, ashtu edhe
atyre izraelitë: të krishterët janë të mirëpritur, janë qytetarë në kuptimin e mirëfilltë
të fjalës, që i respektojnë ligjet civile. Ne nuk kemi probleme si të krishterë, në
nivel të disa qeverive - por kemi nevojë edhe për lirinë e ndërgjegjes, të konvertimit,
një e drejtë, që të krishterëve në vendet e arabe nuk u njihet akoma.