Papa: Jezusi është zhytur në realitetin e kushteve njerëzore dhe e kupton brishtësinë
tonë.
Papa Benedikti XVI në solemnitetin e sotëm të Pagëzimit të Krishtit, ka pagëzuar 20
fëmijë në Kapelën Sikstina në Vatikan, gjatë kremtimit të Meshës së Shenjtë. “Jezusi
tregohet solidar me ne, me mundimin tonë për t’u kthyer në udhën e Hyjit, në përpjekjen
tonë për të hequr dorë nga egoizmat tanë, për t’u shkëputur prej mëkateve tona, për
të na thënë se nëse ne e pranojmë në jetën tonë, Ai na ndihmon të çohemi nga rëniet
tona e të ngrihemi në lartësitë e Hyjit Atë. E ky solidaritet i Jezusit nuk është
ushtrim i thjeshtë u mendjen dhe vullnetit. Jezusi është zhytur realisht në kushtet
tona njerëzore, i ka jetuar e përjetuar deri në fund të fundit, të gjitha, përveç
mëkatit, dhe është në gjendje ta kuptojë dobësinë e brishtësinë tonë”. Kështu pra
pohoi mes tjerash Papa Benedikti XVI gjatë homelisë mbajtur në Meshën e Shenjtë, në
Kapelën Sikstina në Vatikan, ku kremtoi Sakramentin e Pagëzimit 20 fëmijëve. Për
këtë – shtoi Benedikti XVI – Ai, Jezusi shkon drejt njerëzimit plot përdëllim, mirëkuptim,
zgjedh të “vuan bashkë me” njerëzit, të bëhet pendestar së bashku ta. Kjo është vepra
e Hyjit të cilën Jezusi don ta kryejë: misioni hyjnor për t’u përkujdesur për atë
njeri që është i plagosur, që është i lënduar e për të mjekuar atë njeri që sëmuret,
për të marrë mbi vete mëkatin e botës”.