Sot kremtohet Dita Botërore e Emigrantit dhe e Refugjatit
Këtë të diele kremtohet Dita Botërore e Emigrantit dhe e Refugjatit e, në tetor, u
botua edhe Mesazhi i Benediktit XVI, kushtuar këtij takimi. “Emigrimet:
shtegtim feje e shprese” titullohet Mesazhi. Tingëllon si urim i Papës për të
gjithë njerëzit që ndërrojnë vend, në kërkim të kushteve më të mira të jetesës, por
edhe për kombet, që i presin, duke i nxitur t’u hapin portat, në shenjë solidariteti.
Po kujtojmë disa mendime të Papës kushtuar kësaj teme. Si pritet arritja e emigrantit
në vend të huaj? Me shumë indiferencë e pak, krejt pak, përfillje: për të vetë, për
familjen e tij e për fantazmat, që besohet se ndryn në shpirt. Janë shumë të përhapura
këto ndjenja, në viset e shpresës, ku dynden të pashpresët. Kanë parë vdekjen me sy
për sy duke kapërcyer detin mbi një skaf, të lagur deri në palcë nga ujërat e trazuara?
Kanë arritur mbi një mjet përvëlues, në temperaturë 50 °, me fëmijët e vdekur pranë?
Kjo ka rëndësi, ndoshta, vetëm për mjekët, infermierët, vullnetarët, që përpiqen t’ua
rikthejnë një thërrime dinjiteti njerëzve, në sytë e të cilëve pasqyrohet vetë skëterra,
prej nga sapo kanë dalë, e ku kanë jetuar gjatë. Por jo për të tjerët, që, në rastin
më të mirë i presin emigrantët me indiferencë, e zakonisht, me pakënaqësi të dukshme.
Madje ka edhe nga ata, të cilët do të dëshironin të krijonin një shkretëtirë rreth
njerëzve, që sapo kanë kapëcyer detin dhe rripat e ndaluar të tokës ndërmjet dy kufijve
kaq të ndryshëm “Por ju, u ka kujtuar shumë herë Benedikti XVI të krishterëve, nuk
duhet të mendoni e aq më pak, silleni kështu”: “Në veprimtarinë e
saj të mikëpritjes e të dialogut me emigrantët e endacakët, bashkësia e krishterë
ka si pikëmbështetje të vazhdueshme vetjen e Krishtit, Zotit tonë. Ai u la trashëgim
dishepujve të tij një rregull të artë për jetën: urdhërimin e ri të dashurisë” (Audienca
me Këshillin Papnor të Emigrantëve, 15 maj 2008). E që në bagazhin e atyre,
të cilët largohen nga situata të vështira, të mos ketë vetëm kalvar udhëtimi e shtegtim
kah një ardhmëri krejtësisht e paqartë, por fe e shpresë, si uron Papa në Mesazhin
për Ditën e Emigrantit, duhet bërë një hop i vërtetë cilësor qytetërimi. E krishterimi
ndihmon për ta ndryshuar vizionin për emigrimet e emigrantët: “Emigrimet
ftojnë për të nxjerrë në dritë unitetin e familjes njerëzore, vlerën e mikpritjes,
të strehimit, të dashurisë për të afërmin. Pa harruar se kjo duhet të gjejë shprehjen
e vet në gjeste të përditshme, në bashkëpjesëmarrjen e në kujdesin për të tjerët,
posaçërisht për më nevojtarët. Ja pse Kisha i fton besimtarët t’ua hapin zemrat emigrantëve
dhe familjeve të tyre, duke e ditur se ata nuk janë “problem”, por “pasuri”(Kongresi
Botëror i Emigrantëve, 9 nëntor 2009). Janë pasuri e burim,
sepse për Kishën - e Benedikti XVI e ripohon këtë edhe në Mesazhin e sivjetëm - emigrantët
e refugjatët, me aftësitë e tyre, mund të japin një ndihmesë të madhe për mirëqenien
e vendeve ku strehohen. E në se e drejta për të emigruar është një nga shtyllat themelore
të lirisë individuale, është kështu, shkruan Papa në mesazh, edhe ajo e shtetit për
të rregulluar flukset e emigrantëve: “Emergjenca në të cilën është shndërruar
në kohët tona ky fenomen, kërkon nga ne solidaritet e njëkohësisht, edhe përgjigje
të frytshme politike. Edhe vendet nga vijnë emigrantët duhet ta njohin mirë përgjegjësinë,
jo vetëm pse bëhet fjalë për bashkëqytetarët e tyre, por edhe pse e kanë për detyrë
të punojnë për të zhdukur shkaqet, që nxisin emigrimin e parregullt, si dhe për të
shkulur me rrënjë të gjitha format e kriminalitetit, të lidhura me emigrimin”.