Imzot Massafra: Zoti na bekoftë e dhuroftë paqen e Tij gjatë vitit 2013
Fjala përshëndetëse e imzot Angelo Massafra në tetarin e Shkodrës Migjeni më 8 janar
2013 me rastin e paraqitjes së Mesazhit të Papës Benediktit XVI për Ditën e 46-të
Botërore të Paqes 2013, kremtuar më 1 janarin e kaluar me temë: “Lum veprimtarët e
paqes”, para publikut shkodran. “Shumë të Nderuara Autoritete fetare, shumë
të Nderuara Autoritete civile, shumë të dashur vëllezër e motra! Vit të mbarë të
gjithëve! Këtë ditë të parë të vitit 2013 do të doja t’i dërgoj çdo burri e çdo gruaje
të dioqezës sonë bekimin e Hyjit dhe urimin tim të paqes për një Vit të mbarë për
Shkodrën. Po e bëj këtë me formulën e hershme që gjendet në Shkrimin e Shenjtë, Bibël:
« Zoti të bekoftë e të ruajt! Të ndriçoftë Zoti me fytyrën e vet e pastë mëshirë për
ty! E sjelltë Zoti fytyrën e vet drejt teje e ta dhëntë paqen!» (Num 6,24-26). “Lum
pajtuesit”: kjo është tema e zgjedhur nga Benedikti XVI për kremtimin e Ditës
Botërore të Paqes 2013. Dua të falënderoj Atin e Shenjtë, Benediktin XVI, që i ka
dhënë këtë mesazh mbarë botës. Falënderoj Z. Luigj Mila, Përgjegjës i Qendrës Drejtësi
e Paqe, shkollat tona, grupet famullitare, bashkëpunëtorët dhe Drejtorin e Teatrit
për këtë mbrëmje të bukur. Ashtu sikurse drita dhe ngrohtësia e diellit janë një
bekim për tokën, e tillë është edhe drita e Hyjit për njerëzimin, kur Ai bën të ndriçojë
fytyra e vet mbi të. Dhe kjo ka ndodhur me lindjen e Jezu Krishtit! Prandaj, tetë
ditë pas Krishtlindjes, kur Kisha, sikurse Virgjëra Nënë Maria, i dëfton botës Jezusin
e sapolindur, Princin e Paqes, kremtojmë Ditën Botërore të Paqes. Po, ai Fëmijë, që
është Fjala e Hyjit e bërë njeri, ka ardhur për t’u sjellë njerëzve një paqe që bota
nuk mund ta japë (krh. Gjn 14,27). Misioni i tij është ta shembë «murin e armiqësisë»
(krh. Ef 2,14). Dhe kur, në brigjet e liqenit të Galilesë, Ai shpall «Lumturitë»
e tij, ndër to është edhe «Lum pajtuesit sepse do të quhen bijtë e Hyjit» (Mt
5,9). Kush janë pajtuesit? Janë të gjithë ata që, ditë për ditë, mundohen ta mposhtin
të keqen me të mirën, me forcën e të vërtetës, me armët e lutjes e të faljes, me punën
e ndershme dhe të bërë mirë, me kërkimin shkencor në shërbim të jetës, me veprat e
mëshirshme të trupit e të shpirtit. Pajtuesit janë të shumtë, por nuk bëjnë zhurmë.
Sikurse tharmi në brumë, bëjnë të rritet njerëzimi sipas planit të Hyjit. “Njeriu
është bërë për paqen”. Paqja është e mundur... është në duart tona”. Një vit
i ri është si një udhëtim: me dritën dhe hirin e Hyjit, le të jetë një ecje paqeje
për çdo njeri, për ato familje që vuajnë për shkak të vrasjeve, për Shkodrën, për
Shqipërinë, për Tokën e Shenjtë dhe për të gjithë botën. Pra, t’i bashkojmë forcat
tona, shpirtërore, morale dhe materiale që të gjithë të jemi njerëz pajtimi e paqeje. Ky
është urimi që u bëj me gjithë zemër të gjithëve, të rinj dhe të rritur: të gjithë
protagonistë, ditë pas dite, për një vit më të mirë. Nga zemra ju falënderoj të gjithëve
dhe uroj që viti 2013 të jetë vit më i mbarë për Shkodrën dhe për Veriun. Për shumë
vjet! Faleminderit”! Imzot Angelo Massafra kryeipeshkëv Shkodër,
teatri Migjeni, 08.01.2013