Папа за сем гадоў сустрэўся з усімі біскупамі свету

Пасля больш чым сямі гадоў пантыфікату Бэнэдыкт XVI завяршыў першую серыю асабістых сустрэч са сваімі супрацоўнікамі. За час пасля ўступлення на Пасад св. Пятра ў красавіку 2005 г. ён прыняў усе біскупскія групы з цэлага свету для асабістай размовы аб “сітуацыі на месцах”. Апошняй у лістападзе стала дэлегацыя французскай біскупскай канферэнцыі, паведаміў сакратар Кангрэгацыі па справах Біскупаў, арцыбіскуп Ларэнца Балдзісэры. Вясной з прадстаўнікоў 227 італьянскіх дыяцэзій пачнецца другая серыя сустрэч.

Права Каталіцкага Касцёла прадугледжвае, што члены епіскапатаў рэгулярна павінны здзяйсняць візіт “ad limina Apostolorum” (да Апостальскіх парогаў) у Рым. Сёння ў свеце існуе 2900 каталіцкіх дыяцэзій. Звычайна такія візіты павінны адбывацца раз у пяць гадоў, але гэта не строга рэгламентавана. У той час, як члены французскага епіскапату здзейснілі падарожжа аднойчы, у лістападзе, біскупы з Папуа-Новай Гвінеі наведалі Рым два разы: у чэрвені 2005 г. і чэрвені 2012 г.

Біскупы Кітайскай Народнай Рэспублікі з-за тонкіх дыпламатычных нюансаў і нарматыўных абмежаванняў не падарожнічаюць ў Ватыкан. Таму кітайскі епіскапат падчас свайго візіту “ad limina Apostolorum” прадстаўлялі іерархі з Ганконгу і Макао ў 2008 г.

Як паведаміў арцыбіскуп Балдзісэры, рэгулярныя візіты і звязаныя з імі справаздачы ўвёў яшчэ папа Захарый у 743 г., а Сікст V пацвердзіў гэта правіла ў 1585 г. Падчас візітаў размова ідзе не толькі пра юрыдычна адміністрацыйную руціну, адзначыў ватыканскі іерарх, але пра “досвед агульнай пастырскай заклапочанасці” на розных узроўнях Касцёла.