Bashkësitë katolike kineze e kremtuan me devocion Krishtlindjen
Në krahinat e ndryshme të Kinës së pafundme, Krishtlindja u jetua me pjesëmarrjen
masive të bashkësive katolike lokale. Dashuri për të afërmin, ungjillëzim e jetë
feje, ishin tri fjalët-kyçe, mbi të cilat reflektuan bashkësitë katolike kineze,
gjatë kremtimit të Krishtlindjes, atmosfera e së cilës vijon. Për festat e dimrit,
njofton agjencia Fides, në Kinë u kremtua edhe dita e tetë e bamirësisë, organizuar
nga Jinde Charity, me titull “Unë e ti, së bashku”. Ndihmat e mbledhura dhe
dhurimet e rreth 400 pjesëmarrësve, me vlerë rreth 50 mijë euro, do t’i dorëzohen
organizatës për vajzat e familjeve të varfëra dhe fëmijët jetimë e të gjymtuar. Ndërsa
shuma, që u mblodh në një mbrëmje tjetër bamirësie, do të përdoret plotësisht për
të sëmurët nga Sida. Lajmi i këtyre ngjarjeve u transmetua nga një mori organesh shtypi,
gjë e pazakontë në Kinë, ku të krishterët kalojnë shpesh periudha të vështira e kremtojnë
në kushte të mirënjohura nga besimtarët, që e jetojnë fenë e tyre nën diktaturat ateiste-komuniste.
Gjithnjë gjatë festave, u bënë edhe një mori vizitash baritore: imzot Chen Gong Ao,
ipeshkëv i dioqezës së Nan Chong, për shembull, i nxiti besimtarët ta jetojnë me gjithë
shpirt Vitin e Fesë, shpallur nga Benedikti XVI e t’i kushtohen me të gjitha forcat
ungjillëzimit. Dioqeza e Da Zhou, në provincën e Si Chuan, ftoi në kremtimet e
Krishtlindjes edhe shumë kinezë që nuk e njohin fenë e krishterë, duke shfrytëzuar
rastin për t’ia çuar kumtimin e madh të Ungjillit edhe atyre, që nuk e kanë dëgjuar
kurrë. Së fundi, në jug të Si Chuan, Krishtlindja u kremtua edhe me valle e këngë
tipike vendase, për të dëshuar, kështu, se Festa e Ardhjes së Zotit mes nesh, është
festë që i mbush njerëzit e të gjitha racave, me të njëjtin gëzim.