Больш за 40 тыс. маладых
людзей прыняло ўдзел у малітве з Бэнэдыктам ХVI на плошчы св. Пятра ў Ватыкане ў суботу
29 снежня. Гэта быў цэнтральны пункт ХХХV Еўрапейскай сустрэчы моладзі, якую штогоду
арганізуе экуменічная супольнасць з Тэзэ. Такая сустрэча ўжо чацьвёрты раз адбываецца
ў Рыме, апошняя прашла ў 1987 г. У сваёй прамове да моладзі Папа сказаў, што ён,
як і яго папярэднік, бл. Ян Павел ІІ “ёсць пакліканы быць пілігрымам даверу ў імя
Хрыста”. Святы Айцец нагадаў, што гэтую форму пілігрымкі прапанаваў моладзі заснавальнік
супольнасці з Тэзэ, брат Ражэ, каб падтрымаць іх на шляху экуменізму. З гэтай нагоды
Пантыфік скіраваў спецыяльныя прывітанні да праваслаўнай і пратэстанцкай моладзі,
і запэўніў усіх, што “Каталіцкі Касцёл будзе пастаянна спрыяць пошуку шляхоў прымірэння
з мэтай дасягнення бачнага адзінства сярод хрысціян”.
“Адзінства, якім з’яўляецца
Цела Хрыста, мае патрэбу ў вас і вы маеце ў ім месца, будучы суадказнымі ў перадаванні
свету Добрай Навіны Евангелля”, - патлумачыў Папа моладзі і дадаў, што Хрыстус не
адпіхае іх ад свету. “Ён пасылае вас там, дзе “святло гасце і каб вы неслі яго
іншым. Вы пакліканыя быць святлом для тых, хто жыве вакол вас”, - адзначыў Бэнэдыкт
ХVI. Пантыфік нагадаў, што дзякуючы іх клопату пра больш справядлівае размеркаванне
зямных дабротаў і з-за іхняй прыхільнасці на карысць справядлівасці і новай салідарнасці
паміж людзьмі, яны дапамагаюць тым, якія жывуць вакол іх, лепш зразумець , што Евангелле
вядзе нас адначасова да Бога і да іншых людзей. “Болей таго, дзякуючы вашай веры
вы паспрыяеце ўзросту надзеі на зямлі”, - сказаў Папа на заканчэнне сваёй прамовы
да моладзі.