«Եգիպտոսի Հետ Համամիտ Ենք, Որ Շրջանի Ժողովուրդները Իրենց Ճակատագիրը Ճշդեն» Կ՛ըսէ Սերկէյ
Լաւրով։
Ռուսիոյ արտաքին գործոց նախարար Սերկէյ Լաւրով Եգիպտոսի արտաքին գործոց նախարար Մոհամմետ
Քամել Ամր-ի հետ Մոսկուայի մէջ իր ունեցած հանդիպումէն ետք յայտարարեց, որ Մոսկուա Գահիրէի
հետ համամիտ է, թէ «շրջանի ժողովուրդները պէտք է իրենց ճակատագիրը ճշդեն` առանց արտաքին
միջամտութեան»: Լաւրով ըսաւ, որ «Ռուսիա կը գնահատէ Կազայի մէջ տագնապը լուծելու եւ
միջպաղեստինեան տարակարծութիւնները շրջանցելու ձգտող եգիպտական ջանքերը»: Ռուսիոյ
դիւանագիտութեան պետը ըսաւ, որ երկու կողմերը քննարկած են սուրիական տագնապի հարցը եւ
հաստատած, որ Սուրիոյ մէջ բռնարարքները պէտք է դադրին եւ Ժընեւի հաղորդագրութեան հիմամբ
լուծում մը գործադրուի` աւելցնելով, որ «միայն սուրիացի ժողովուրդը կրնայ որոշել, թէ
Ասատ ե՛րբ պէտք է մեկնի, իսկ միջազգային ընտանիքը պէտք չէ նախապայմաններ ներկայացնէ»: Լաւրով
յայտնեց, որ Մոսկուա յուսախաբ է սուրիական ընդդիմութենէն, որ վարչակարգի տապալումը կը
նկատէ իբրեւ իր գլխաւոր առաջադրանքը` նշելով, որ Մոսկուա պատրաստ է Սուրիոյ Ազգային Համաձայնական
Մարմինի նախագահ Ահմետ Մաազ Խաթիպի հետ քննարկումներ կատարելու: Իսկ Եգիպտոսի դիւանագիտութեան
պետը նշեց որ սուրիական ընդդիմադիր Ազգային Համաձայնական Մարմինի կեդրոնատեղին ներկայիս
Գահիրէի մէջ է, աւելցնելով որ եգիպտական կողմը անոր հետ մնայուն կապի մէջ է Սուրիոյ
մէջ դէպի ժողովրդավարութիւն շրջադարձի եւ կազմակերպուած փոփոխութեան ծրագիր մը մշակելու
համար: