Ipeshkvi i Halebit në Siri: autoritetet mbetën të kënaqur nga fjalët e Papës. Kishat
plot për Krishtlindje
Guvernatori i Halebit në Siri, Mohamad Vakhid Akkad, i shoqëruar nga autoritete politike
të vendit, u takua javën e shkuar me ipeshkvijtë e meshtarët katolikë, me rastin e
urimeve për Krishtlindje. Siç tregoi ipeshkvi, imzot Xhuzepe Naxaro, vikar apostolik
i Halebit, guvernatori shprehu vlerësim për fjalët e Papës Benedikti XVI, i cili në
mesazhin e Krishtlindjes denoncoi gjendjen tragjike në Siri dhe u kërkoi krerëve të
kombeve të bëjnë ç’është e mundur për të ndaluar konfliktin e për të sjellë paqen.
“Po e shkatërrojnë vendin- thotë imzot Naxaro. Kushdo të fitojë, do të ketë si trashëgim
vetëm një grumbull rrënojash, njerëzore e materiale”. Pikërisht rajoni i Halebit
vazhdon të mbetet fushë beteje. Forcat qeveritare dhe rebelët luftojnë për kontrollin
e aeroportit ushtarak. Por pavarësisht nga kjo situatë, shpjegon ipeshkvi, të krishterët
festuan Krishtlindjen, së paku më 25 dhjetor, ndersa meshët e 24 dhjetorit u kremtuan
përpara natës, për t’u dhënë të gjithëve mundësi të kthehen shpejt në shtëpi. Në ditën
e Krishtlindjes, kishat u mbushën plot e përplot, megjithëse se shumë të krishterë
janë larguar. Ata që mbeten shtrëngojnë radhët dhe kërkojnë ngushëllim tek Zoti e
tek njëri-tjetri. Edhe kjo është Krishtlindje!