“Прыклад св. Стэфана,
вернага Пану, аж да апошняга моманту, няхай падтрымлівае пераследаваных хрысціян,
а наша малітва іх умацуе”, - гэтыя словы Бэнэдыкта XVI, прамоўленыя на наступны дзень
пасля ўрачыстасці Божага Нараджэння маюць вострую актуальнасць сёння. Па ўсім свеце,
вызнаўцы Хрыста працягваюць праліваць сваю кроў толькі па адной прычыне – таму што
з’яўляюцца хрысціянамі. У асабліва складанай сітуацыі знаходзяцца вызнаўцы Хрыста
ў Пакістане, дзе як ніколі, павялічыўся іх пераслед і гвалтоўны перавод у іслам.
Аб гэтым у інтэрв’ю нашаму радыё расказаў заснавальнік Асацыяцыі пакістанскіх хрысціян
у Італіі Мабін Шахід.
Праваабаронца адзначыў, што гвалтоўнае навяртанне ў іслам
у Пакістане тычыцца не толькі хрысціян, але таксама прадстаўнікоў іншых рэлігійных
меншасцяў. Ён падкрэсліў, што пакуль быў жывы Шахбаз Бхаці, пакістанскі міністр па
справах меншасцяў, забіты ісламістамі ў сакавіку 2011 г., у год здзейснялася каля
700 гвалтоўных пераводаў, але зараз гэты феномен больш не паддаецца кантролю, а колькасць
падобных выпадкаў павялічылася ў два разы. Мабін Шахід расказаў, што ісламісты
выкрадаюць на вуліцах хрысціянскіх ці індуіскіх дзяўчынак, падвяргаюць іх гвалту,
а затым, пад пагрозамі прымушаюць адмовіцца ад сваёй веры і прыняць іслам. Ён адзначыў,
што ўлады не рэагуюць на заяўленні аб гвалтоўным навяртанні і таму сітуацыя толькі
пагаршаецца.
Таксама Мабін Шахід расказаў аб лёсе Асіі Бібі – хрысціянке, маці
пяці дзецей, якая з 2009 г. знаходзіцца ў турме ў чаканні смяротнага пакарання, на
якое было асуджанна згодна з так званым “законам аб блюзнерстве”. Паводле праваабаронцы,
надзея на вызваленне Асіі Бібі застаецца слабой, бо яе выпадак прыцягнуў увагу ўсёй
міжнароднай супольнасці і цяпер для ісламістаў пакаранне жанчыны стала прынцыпіяльным.
Мабін Шахід адзначыў, што закон аб блюзнерстве, мае вельмі шмат прыхільнікаў сярод
членаў мусульманскіх рэлігійных рухаў і палітычных партый у Пакістане, таму вызваленне
Асіі Бібі становіцца амаль немагчымым.