Заканчваецца вельмі насычаны год пантыфіката Бэнэдыкта XVI
Год, які падыходзіць
да свайго заканчэння быў пражыты Бэнэдыктам XVI вельмі інтэнсіўна і плённа: міжнародныя
падарожжы, наведванне італьянскіх гарадоў, удзел у сустрэчах з вернікамі, сотні прамоваў
і выступленняў. Вера, сям’я, мір – гэтыя тэмы часцей за ўсё гучалі з вуснаў Пантыфіка.
Нягледзячы на пажылы ўзрост Папа з адвагай і рашучасцю адказвае на выклікі, якія стаяць
перад Касцёлам. Ён нясе надзею і ўпэўненасць у заўтрашнім дні людзям розных прафесій,
узростаў і нацыянальнасцяў. У сакавіку 2012 г. падчас візіта у Мексіку Папа асудзіў
насілле, карупцыю і гандль наркотыкамі, а на Кубе заклікаў да адвагі ўлады і міжнародную
супольнасць. “Куба і свет маюць патрэбу ў пераменах, але яны наступяць толькі калі
кожны задумаецца аб праўдзе і вырашыцца ўстаць на шлях любові, сеючы прымірэнне і
братэрства”, - казаў Папа. Таксама, пад знакам неабходнасці прымірэння, прайшоў візіт
Святога Айца ў Ліван, у верасні 2012 г. Наведаўшы краіну, якая мае мяжу з палаючай
у канфлікце Сірыяй, Бэнэдыкт XVI выканаў місію пілігрыма супакою. Звяртаючыся да моладзі
Папа казаў: “Неабходна, каб увесь Блізкі Усход, гледзячы на вас, зразумеў, што мусульмане
і хрысціяне, іслам і хрысціянства, могуць жыць разам без нянавісці, у павазе да веры
кожнага, каб супольна будаваць свабоднае і чалавечае грамадства”.
Падчас Сінода
па новай евангелізацыі, Папа заклікаў католікаў з адвагай дзяліцца з іншымі сваёй
верай. “Усе людзі маюць права ведаць Езуса Хрыста і Яго Евангелле; гэтаму адпавядае
абавязак хрысціян, усіх хрысціян – святароў, законнікаў і свецкіх, абвячшаць добрую
навіну”, - сказаў Пантыфік. Абвяшчаючы Год веры ў 50-ю гадавіну ІІ Ватыканскага Сабора
Бэнэдыкт XVI падкрэсліваў, што робіць гэта “не для таго, каб ўшанаваць юбілей, але
таму што ў гэтым ёсць патрэба, яшчэ большая чым 50 гадоў таму”.
Не менш важнымі
былі словы Святога Айца прамоўленыя падчас Сусветнай сустрэчы сем’яў у Мілане. Сям’я,
паводле Папы – гэта адзіная сіла, якая можа змяніць свет. Асабліва памятным застаўся
заклік Бэнэдыкта XVI, які тычыўся клопату аб разведзеных. “Мне здаецца, што вялікае
заданне парафіі, каталіцкай супольнасці заключаецца ў тым, каб рабіць усё магчымае,
каб яны адчувалі сябе любімымі, прынятымі, што не знаходзяцца “звонку” нават калі
не могуць атрымліваць прабачэнне і Эўхарыстыю; павінны бачыць, што нават так, упоўні
жывуць у Касцёле”, - казаў Папа.
Акрамя гэтага можна узгадаць абвяшчэнне Папам
новых доктараў Касцёла, заснаванне Папскай Акадэміі Латыні, прызначэнне новага прэфекта
Кангрэгацыі Веравучэння, адвагу і супакой з якімі Святы Айцец прыняў навіну аб крадзяжы
яго уласных дакументаў. Акрамя таго, Папа пачаў выкарыстоўваць “Tвітэр” і апублікаваў
апошнюю кнігу з трылогіі аб асобе Езуса з Назарэта.