Папа заклікае маліцца аб паглыбленні знаёмства вернікаў з Хрыстом
Сталі вядомы малітоўныя
інтэнцыі Бэнэдыкта XVI на студзень 2013 г. Першая з іх тычыцца клопату Пантыфіка аб
паглыбленні веры і асабістага знаёмства вызнаўцаў Хрыста са сваім Панам. Гэта тэма
з’яўляецца асабліва блізкай Папе: ёй прысвечана большая частка прамоваў і гамілій
Святога Айца, яго ініцыятыва па абвяшчэнні Года веры і пашырэнню новай евангелізацыі,
а таксама выданне кніг аб асобе Езуса Хрыста, якія дапамагаюць лепш пазнаць Яго і
па-сапраўднаму бачыць у Богу добрага сябра. У сваёй малітоўнай інтэнцыі Папа заклікаў
вернікаў маліцца, “каб у гэтым “Годзе веры” хрысціяне маглі паглыбіць сваё знаёмства
з таямніцай Хрыста і з радасцю сведчыць аб дары веры ў Яго”. Таксама Бэнэдыкт XVI
абвясціў аб сваёй місійнай інтэнцыі. Яна прасякнута клопатам аб хрысціянах Блізкага
Усходу, якія перажываюць цяжкі перыяд сваёй гісторыі і церпяць пакуты выкліканыя дыскрымінацыямі
і шматлікімі канфліктамі. Місійная інтэнцыя Святога Айца гучыць, “каб хрысціянскія
супольнасці Блізкага Усходу, часта дыскрымінаваныя, атрымлівалі ад Святога Духа сілу
для вернасці і настойлівасці”.