Papa në Mesazhin ‘Urbi et Orbi': Krishti sjelltë paqe në Siri, në Tokën e Shenjtë
e në Afrikë: “Ka shpresë në botë”.
Lindja e Jezusit bëri të mugullojë një tokë e mirë, e lirë nga çdo egoizëm e çdo mbyllje,
pavarësisht nga konfliktet e urgjencat, që vijojnë ta trondisin. E pohoi këtë, sot
paradite, Benedikti XVI në Mesazhin e tij festiv ‘Urbi et Orbi’, në mesditën e solemnitetit
të Krishtlindjes, sipas traditës, në lozhën qëndrore të Bazilikës së Vatikanit. Papa
bëri posaçërisht thirrje për paqen në Siri, në Tokën e Shenjtë e në Afrikë, duke e
përfunduar mesazhin me urimet e Krishtlindjes, shqiptuar në 65 gjuhë. As luftërat
më të tmerrshme e as mizoritë më të mëdha mbi faqe të tokës, nuk mund ta zhdukin kurrë
e as ta errësojnë sigurinë e krishterë se në botë ekziston shpresa, ashtu si ekzistojnë
paqja e dashuria, sepse pikërisht nga toka, dymijë vjet më parë, mbiu e vërteta e
Hyjit, që u bë njeri. Benedikti XVI i nisi me fjalët paqtore të një Psalmi të lashtë,
urimet për Krishtlindje, drejtuar një bote, që vijon të tronditet ende sot nga shumë
kriza. Bota vuan nga konflikte e emergjenca humanitare, të cilat Papa i kujtoi në
Mesazhin ‘Urbi et Orbi’, duke bërë që zëri i tij të jehojë në të gjitha kontinentet
e të dëgjohet nga të gjitha qeveritë, që vlerat absolute të paqes e të respektit të
gjejnë kudo drejtësi e qytetari. Duke nisur nga Siria e nga njerëzit e saj, thellësisht
të përçarë e të plagosur – tha Papa - nga një konflikt, që nuk i kursen as të pambrojturit
e shkakton viktima të pafajshme: “Edhe një herë bëj thirrje t’i jepet fund
gjakderdhjes, të krijohen lehtësira për t’i ndihmuar refugjatët e të shpërngulurit
e, përmes dialogut, të gjindet rrugëdalja politike nga konflikti. Paqja mbiftë nga
Toka, ku lindi Shëlbuesi, e Ai u dhuroftë izraelitëve e palestinezëve guximin për
t’u dhënë fund viteve të pafundme të luftërave e të përçarjeve e për të rifilluar
vendosmërisht udhën e bisedimeve”. Të njëjtin urim Papa e bëri edhe për
Vendet e Afrikës Veriore, që po kalojnë nëpër një periudhë të thellë tranzicioni,
në kërkim të një ardhmërie të re, posaçërisht në Egjipt, tokë e dashur dhe e bekuar
nga fëmijëria e Jezusit. Të gjithëve Benedikti XVI u uroi të ndërtojnë së bashku
shoqëri të bazura mbi drejtësinë, respektin, lirinë e dinjitetin e çdo njeriu. E,
duke e zhvendosur shikimin më në jug të Kontinentit, shtoi: “Lindja e Krishtit
ndihmoftë për kthimin e paqes në Mali e të harmonisë në Nigeri, ku atentate mizore
terroriste vijojnë të shkaktojnë viktima, posaçërisht ndër të krishterët. Shëlbuesi
i ndihmoftë e i ngushëlloftë refugjatët e Lindjes së Republikës Demokratike të Kongos
e i dhuroftë paqen Kenias, ku atentate gjakatare goditën popullsinë civile e vendet
e kultit”. Më pas Azia. Krishti Fëmijë, pohoi Papa, i shikoftë mirësisht
popujt e shumtë, që jetojnë në këto troje e, në mënyrë të veçantë, ata që besojnë
në Të: “Mbreti i paqes i sjelltë sytë e tij kah Drejtuesit e rinj të Republikës
Popullore kineze, përballë detyrës, që i pret. Uroj ta vlerësojnë ndihmën e feve,
duke i respektuar, në mënyrë që të mund të japin ndihmesën e tyre për ndërtimin e
një shoqërie solidare, në dobi të këtij populli fisnik e të mbarë botës”. Papa
bekoi edhe besimtarët e shumtë, që e kremtojnë Krishtlindjen në Amerikën Latine dhe
uroi që Krishti Fëmijë t’i mbështesë posaçërisht emigrantët dhe qeveritë në impenjimin
për zhvillimin e në luftën kundër kriminalitetit. Prania mbi tokë e njeriut, lindur
në Betlehem nga Maria, pohoi Papa në përfundim, është garanci, që na siguron se ekziston
një tokë e mirë: “Kjo tokë ekziston, e edhe sot, në vitin 2012, nga ky truall
mbiu e vërteta! Prandaj ka gjithnjë shpresë në botë, shpresë të besueshme, edhe në
çastet më të vështira. Gëzuar Krishtlindjen të gjithëve!”. Papa
e përsëriti urimin e Krishtlindjes 65 herë, në 65 gjuhë e të folme të ndryshme, nga
evropianet, tek arabet; nga gjuha aramajke, në gjuhët e Lindjes së largët. Kështu
urimi “Gëzuar Krishtlindjen!” fluturoi, në krahët e erës, nga Urbe, Roma, nëpër shtigjet
e pafundme të Orbe – Botë. E, natyrisht, edhe në Shqipëri, me urimin, që i priu programit
tonë të sotëm: “Për shumë vjet Krishtlindjen!”.