Ռայի Պատրիարքը Այսօր Պիտի Փոխանցէ Ս. Ծննդեան Պատգամը
Ս. Ծննդեան տօնին առիթով մարոնի համայնքի Պշարա Ռայի պատրիարքը այսօր պիտի փոխանցէ իր
պատգամը: Միւս կողմէ, Ռայի պատրիարքը երէկ Պքերքէի մէջ նախագահեց կիրակի օրուան պատարագին,
որուն ընթացքին իր արտասանած քարոզին մէջ աղօթեց առ Աստուած` տարբեր երկիրներու ղեկավարներուն
գութը շարժելու, որպէսզի անոնք խուսափին զէնք տարածելէ եւ ամէն ջանք ի գործ դնեն` պատերազմներէ
եւ բռնարարքներէ հեռու լուծելու համար Լիբանանը յուզող տագնապները: Պատարագէն ետք,
Ռայի պատրիարքը Լիբանանի մէջ Միացեալ Նահանգներու դեսպան Մորա Քոնելլիի հետ ունեցաւ հանդիպում
մը, որուն ընթացքին քննարկեց Լիբանանը եւ շրջանը յուզող իրադարձութիւնները: Ռայի պատրիարքը
շեշտեց լիբանանեան քաղաքական բոլոր ուժերուն միջեւ միասնականութեան անհրաժեշտութիւնը: Ան
յոյս յայտնեց նաեւ, որ Միջին Արեւելքի տագնապը արժանանայ խաղաղ եւ ժողովրդավար լուծումի
մը` վերջ տալով պատերազմին եւ բռնարարքներուն: Ռայի պատրիարքը մտահոգութիւն յայտնեց
Լիբանանի վրայ սուրիական տագնապին ունենալիք հետեւանքներէն: